16 настай охины амь насыг хөнөөсөн хэрэгт холбогдсон Э.Н болон Э.Г нарт эрүүгийн хэрэг үүсгэн, яллагдагчаар татаж, цагдан хорих арга хэмжээ авсныг прокурорын байгууллага мэдээллээ.
Хэргийг мөрдөн шалгах ажиллагааны явцад өмнө нь тэднийг хохирогчоор тооцож байсан ч, шинэ нотлох баримт гарсантай холбогдуулан статусыг нь өөрчилж, сэжигтнээр шалгаж эхэлсэн байна.
Хоёр хүний амь хөнөөсөн хэрэг
Уг хэрэгт 16 настай охиноос гадна 32 настай эмэгтэй амь насаа алдсан бөгөөд хэргийг Ц.Д нарын хэд хэдэн хүнтэй холбон шалгаж байгаа тухай эх сурвалж мэдээлэв.
Хэргийг шалгах явцад талийгаач охины эцэг, эх олон нийтийн сүлжээнд мэдээлэл нийтэлж, охиных нь цогцсын дэргэд сууж буй Э.Н, Э.Г нарын зургийг ил болгосон нь олон нийтийн анхаарлыг татсан билээ.
Прокурорын шийдвэр
Шүүхээс уг хэргийг “мөрдөн шалгах ажиллагаа дутуу хийгдсэн” гэж үзэн прокурорт буцаасны дараа, шинэ баримтуудыг үндэслэн Э.Н, Э.Г нарыг яллагдагчаар татаж, цагдан хорих шийдвэр гаргасан байна.
Одоогоор хэргийг Прокурорын байгууллага болон Цагдаагийн Ерөнхий газрын Мөрдөн байцаах алба хамтран үргэлжлүүлэн шалгаж байгаа бөгөөд хэрэгт холбогдсон бусад этгээдүүдийн оролцоо, үүргийг тогтоох ажиллагаа явагдаж байна.
