Өмнөговь аймгийн Гурвантэс сумын нутагт өчигдөр буюу 2025 оны тавдугаар сарын 15-ны өдөр 19:00 цагийн орчимд 3.7 магнитудын хүчтэй газар хөдлөлт болсон талаар албаныхан мэдээллээ. Уг газар хөдлөлтийн чичирхийлэл орон нутгийн иргэдэд мэдрэгдсэн боловч ямар нэгэн хохирол бүртгэгдээгүй байна гэж Онцгой байдлын ерөнхий газраас (ОБЕГ) мэдээлжээ.
Сүүлийн үед Монгол Улсын газар нутагт газар хөдлөлтийн идэвхтэй байдал ажиглагдаж байгаа бөгөөд өнгөрсөн долоо хоногт Хэнтий аймгийн Өмнөдэлгэр сумын төвөөс баруун хойд зүгт 109 км, Батширээт сумаас баруун зүгт 79 км, Төв аймгийн Мөнгөнморьт сумын төвөөс зүүн хойд зүгт 76 км зайд 4.7 магнитудын хүчтэй газар хөдлөлт болж байсныг мөн тэмдэглэсэн юм.
Монгол орны хэмжээнд 2025 он гарсаар нэгдүгээр сарын 1-нээс дөрөвдүгээр сарын 1 хүртэл нийт 12 удаа 3.5-5.1 магнитудын хүчтэй газар хөдлөлт бүртгэгджээ.
Газар хөдлөлтийн хүчийг хоёр өөр хэмжүүрээр хэмждгийг мэргэжлийн байгууллагууд онцолж байна. Магнитуд нь газрын хөрсөн доорхи хөдлөлтийн төвийг хэмждэг бол баллын хэмжүүр нь газар дээр мэдрэгдэж байгаа хүчийг тодорхойлдог. Жишээлбэл:
- 1-3 баллын газар хөдлөлтөд хүмүүс бага зэрэг чичирхийлэл мэдэрч, аяга таваг ялимгүй хөдөлдөг.
- 4-5 баллын үед чичирхийлэл мэдэгдэхүйц болж, тавилга, гэрлийн бүрхүүл савлаж, хүмүүсийн дунд сандрал үүсч болзошгүй.
- 6-7 баллын үед хүнд зогсох хүндрэлтэй болж, хана, тааз хагарч, шил хагарах зэрэг томоохон хохирол дагуулах эрсдэл үүсдэг байна.
Энэ удаагийн газар хөдлөлт нь харьцангуй бага хүчтэй байсан ч орон нутаг болон нийслэлд газар хөдлөлтийн бэлэн байдлыг сайтар хангаж, иргэдийг анхаарал сэрэмжтэй байхыг мэргэжилтнүүд сануулж байна.
