Сүүлийн өдрүүдэд Азербайжан болон Оросын харилцаа хурцдаж, хоёр орны хоорондын дипломат зөрчил гүнзгийрч байна. Энэ зөрчлийн шалтгаан нь хоёр улсын нутаг дэвсгэрт хоорондоо харилцан хариу арга хэмжээ авч эхэлсэнтэй холбоотой.
Өнгөрсөн зургадугаар сарын сүүлчээр Оросын аюулгүй байдлын албанаас Екатеринбург хотод олон жилийн өмнөх хүн амины хэрэгтэй холбогдуулан Азербайжаны хэд хэдэн иргэнийг баривчилсан. Энэ ажиллагааны үеэр хоёр иргэн амиа алдсан нь Бакугийн зүгээс ноцтой эсэргүүцэлтэй тулгарч, бүх дипломат болон соёлын харилцаагаа зогсоох шийдвэр гаргахад хүргэжээ.
Үүний хариуд Азербайжаны цагдаагийн байгууллага энэ Мягмар гарагт Оросын найман иргэнийг тус улсын нутаг дэвсгэр дээр зохион байгуулалттай кибер гэмт хэрэг болон хар тамхины наймаа хийсэн хэргээр саатуулсан байна. Тэднийг “зохион байгуулалттай гэмт хэргийн бүлэглэлд” хамаарах этгээдүүд гэж албан ёсоор мэдэгдсэн.
Кремлийн хэвлэлийн албанаас Оросын иргэдээ хамгаалахын тулд “дипломат суваг болон боломжит бүхий л арга хэмжээг авах” талаар мэдэгдсэн нь зөрчлийг улам хурцатгаж болзошгүй.
Энэхүү баривчилгаатай зэрэгцэн Оросын хууль хүчнийхэн Екатеринбургт дахин ажиллагаа явуулж, тус хот дахь Азербайжаны иргэдийн нийгэмлэгийн тэргүүн Шахин Шихлинскийг саатуулсан. Интернэтэд тарсан бичлэгт Шихлинскийгийн машин руу хүч хэрэглэн нэвтэрч, түүнийг чирч гаргаж буй дүрс бичлэг харагддаг. Гэсэн ч түүнийг орой нь сулласан бөгөөд одоогоор гэрчийн статустай байцаагдаж буй гэж мэдээлжээ.
Эдгээр үйл явдлын дараа Азербайжан 6-р сарын 29-нд өөрийн нутаг дэвсгэрт ОХУ-тай холбоотой бүх соёл урлагийн үйл ажиллагааг түр зогсоох шийдвэр гаргаж, Оросын шадар сайдын Бакуд хийх айлчлал болон парламентын төлөөлөгчдийн Москвад хийх айлчлалыг цуцалсан байна.
Мөн Баку дахь ОХУ-ын төрийн мэдээллийн агентлаг “Спутник”-ийн салбарт тусгай ажиллагаа явуулж, байгууллагын ерөнхий эрхлэгч Игорь Картавых болон орлогч Евгений Белоусов нарыг баривчилсан. Энэ нь хоёр улсын мэдээллийн салбар дахь мөргөлдөөнийг ч нэмэгдүүлэв.
Азербайжаны гадаад хэргийн яамны мэдээлснээр, Спутник суваг нь “хууль бус санхүүжилттэйгээр үйл ажиллагаа явуулсан” учраас дээрх арга хэмжээг авсан хэмээн тайлбарласан байна.
Хариуд нь Москва дахь Азербайжаны Элчин сайдад эсэргүүцэл илэрхийлж, Оросын тал уг үйлдлийг олон улсын харилцааны зарчим зөрчсөн гэж үзэж буйгаа илэрхийлжээ.
