Лхагва гарагийн шөнө Польшийн агаарын орон зайд нэвтэрсэн Оросын нисгэгчгүй онгоцыг тус улсын зэвсэгт хүчин илрүүлж, буудаж унагаснаа албан ёсоор мэдэгдлээ.
Албан мэдэгдэл
- “Зэвсэг хэрэглэж, дроныг устгасан. Унасан төхөөрөмжийн байршлыг тогтоох ажиллагаа үргэлжилж байна” гэж Зэвсэгт хүчний удирдлагын төв мэдэгджээ.
- Мөн хил орчмын бүс нутгийн оршин суугчдад гэрээсээ гарахгүй байхыг анхааруулсан байна.
НАТО ба олон улсын байр суурь
- Польш бол НАТО-гийн гишүүн улс бөгөөд байгууллагын дүрмийн дагуу аль нэг гишүүн халдлагад өртвөл бүх гишүүд өртсөнд тооцогддог.
- АНУ-ын төрийн нарийн бичгийн дарга Марко Рубио энэ мэдээллийг хүлээн авснаа сэтгүүлчдэд баталсан.
Нэмэлт арга хэмжээ
- Дроныг устгасны өмнө Варшавын олон улсын нисэх буудлын үйл ажиллагааг түр зогсоосон байна.
- Украины нутагт Оросын томоохон агаарын довтолгоо эхэлсний дараа Польш улс агаарын довтолгооноос хамгаалах систем, радарын хяналтаа дээд түвшинд шилжүүлсэн гэжээ.
- “Агаарын орон зайн аюулгүй байдлыг хангахын тулд шаардлагатай бүх арга хэмжээг авсан, шуурхай хариу арга хэмжээнд бэлэн байна” гэж тус улсын зэвсэгт хүчин мэдэгдсэн байна.
Стратегийн ач холбогдолтой бүс
- Украины хэвлэлүүдийн мэдээлснээр нэг дрон Польшийн зүүн өмнөд Жешув хот руу чиглэн ниссэн аж.
- Жешувийн нисэх буудал нь Украинд хүргэгдэх НАТО-гийн тусламжийн үндсэн дамжин өнгөрөх төв бөгөөд мөн Люблин хотын нисэх буудал ч цэргийн үйл ажиллагаатай холбоотойгоор хаагдсан байна.
Цэргийн сургуулилалтын өмнөх нөхцөл байдал
- Энэ баасан гарагт Орос, Беларусийн хамтарсан “Запад 25” цэргийн сургуулилалт эхлэх гэж байгаа.
- Үүнтэй холбоотойгоор Польш улс үндэсний аюулгүй байдлын үүднээс Беларусийн хил дагуух төмөр замын боомтуудаа хаах шийдвэрийг пүрэв гарагийн шөнө хэрэгжүүлэхээ зарлажээ.
- Ерөнхий сайд Дональд Туск “Энэхүү сургуулилалт маш түрэмгий маневртай тул бид үндэсний аюулгүй байдлаа хамгаалахын тулд хилээ хаахаар боллоо” хэмээн мэдэгдсэн байна.
