Цаг агаарын хүндрэлээс шалтгаалан төлөвлөснөөс бага ургац авсан
Төв аймагт энэ онд 158 мянган га талбайд тариалалт хийж, анх 450 мянган тонн ургац авах зорилт тавьсан боловч цаг агаарын хүндрэл болон давагдашгүй хүчин зүйлсийн улмаас нийт 127.6 мянган тонн ургац хураан авчээ.
Төв аймгийн Хүнс, хөдөө аж ахуйн газрын дарга Л.Даваасүрэнгийн мэдээлснээр, агротехнологийн зөв хандлага баримтласны үр дүнд дараах хэмжээний ургац хураан авсан байна.
- Үр тариа: 32,536 га талбайгаас 25,216.9 тн
- Улаанбуудай: 29,351 га-аас 21,993 тн
- Төмс: 4,339.8 га-аас 45,990.3 тн
- Хүнсний ногоо: 1,872.9 га-аас 28,991.9 тн
- Таримал тэжээл: 11,375 га-аас 25,499.5 тн
- Тосны ургамал: 3,800 га-аас 1,892.7 тн
Тариалангийн салбарын дэмжлэг ба хөрөнгө оруулалт
“Атар-4” аяны хүрээнд аймгийн тариалангийн салбарыг бодлогоор дэмжин, 880 сая төгрөгийн үнэтэй хадлан, тэжээл бэлтгэлийн техник, тоног төхөөрөмжийг Архуст болон Сэргэлэн суманд нийлүүлжээ.
Мөн 1.4 тэрбум төгрөгийн хөрөнгө оруулалтаар техник технологийн шинэчлэл хийснээр тариалангийн аж ахуйн техник шинэчлэл 83 хувь-д хүрч, хаврын тариалалт, ургац хураалтын ажлыг цаг хугацаанд нь гүйцэтгэх боломж бүрдүүлсэн байна.
Аймгийн орон нутгийн хөрөнгө оруулалтаар 450 сая төгрөгийн төмсний үрийн шинэчлэл хийгдсэн бөгөөд 550 сая төгрөгийн үнэтэй 21,250 ширхэг бетонон шонг 12 сумын иргэн, аж ахуйн нэгжид олгож, тариалангийн талбайн хөрс хамгаалалт, үржил шимийг нэмэгдүүлэх ажил хийгджээ.
Хөнгөлөлт, урамшууллын бодлого
Хөрсний үржил шимийг нэмэгдүүлэх зорилгоор бордооны үнийн дүнгийн 30 хүртэл хувьд хөнгөлөлт үзүүлэх бодлого хэрэгжиж байгаа бөгөөд энэ онд 52 иргэн, аж ахуйн нэгж нийт 389.3 сая төгрөгийн хөнгөлөлт эдэлсэн байна.
