Зарим бүсэд агаар тун цэвэр, заримд нь бохирдол эрс ялгарч байна
Сүүлийн өдрүүдэд гарсан хэмжилтийн дүнгээс харахад Улаанбаатарын агаарын чанар дүүрэг, бүсээсээ шалтгаалан эрс ялгаатай байна. Нисэх орчимд агаарын чанар бараг бохирдолгүй, цэвэр хэвээр байгаа бол Зурагт, “Мишээл экспо” орчимд үзүүлэлтүүд зөвшөөрөгдөх хэмжээнд, хэвийн түвшинд хадгалагдаж буйг Агаарын чанарын алба мэдээлжээ.
Харин 13-р хороолол, Зайсан, Ургах наран, Цахилгаан станцын орчим, Яармаг, Амгалан, Шархад, Баруун 4-н зам, Зуун айл, Толгойт, Налайх, Баянхошуу, 1-р хороолол, Таван буудал, Дамбадаржаа зэрэг бүсүүдэд агаарын бохирдол “бага зэргийн” ангилалд орсон үзүүлэлттэй байна. Эдгээртэй харьцуулахад Хайлаастын чанарын үзүүлэлт огцом өндөр гарч, хотын бусад хэсгээс тод мэдрэгдэхээр бохирдолтой бүсээр тодорчээ.
Хүхэрлэг хий, азотын давхар ислийн төвлөрөл хаана илүү байна
Агаарын чанарт нөлөөлдөг гол бохирдуулагч бодисуудын нэг болох хүхэрлэг хий хамгийн ихдээ Ургах наран хороолол, Толгойт, Баянхошуу орчмоос бага боловч илэрхий нэмэгдэлтэй илрээд байна. Азотын давхар исэл нь Баруун 4-н зам, Ургах наран хороолол, Таван буудал, Шархад, Налайх, Амгалан орчимд бусад бүсээс арай өндөр хэмжээнд бүртгэгдэж, “яльгүй өндөр” түвшинд хүрсэн хэмээн тэмдэглэжээ.
Эдгээр үзүүлэлт дангаар өндөр биш мэт боловч, бусад бохирдуулагчтай хавсрах үед иргэдийн эрүүл мэндэд үзүүлэх нөлөө нэмэгдэх эрсдэлтэйг мэргэжилтнүүд сануулдаг.
Тоосонцорын бохирдол: Хайлааст, Зуун айл, 1-р хороолол онцгойлон ялгарлаа
PM10 төрлийн тоосонцрын хэмжээ 1-р хороолол, Зуун айл, Цахилгаан станц, Ургах наран хороолол, Хайлааст, Дамбадаржаа орчимд бага зэрэг өссөн дүнтэй гарсан байна. Энэ нь том ширхэгт тоосонцорын түвшин хэвийн түвшнээс дээшилж эхэлснийг харуулж байгаа хэрэг.
Харин хүний уушгины гүнд нэвчих хамгийн аюултай бохирдуулагч тоосонцор болох PM2.5-ийн хэмжээ илүү олон бүсэд зохих түвшинг давжээ. Баруун 4-н зам, 1-р хороолол, Бөхийн өргөө орчим, Зуун айл, Цахилгаан станц, Ургах наран хороолол, Хайлааст, Шархад, Яармаг, Толгойт, Зурагт, Дамбадаржаа, Баянхошуу зэрэг бүсүүд PM2.5-ийн өндөр үзүүлэлттэй хэсгүүдэд багтаж байна. Эндээс Хайлааст нь бусад бүсээс давсан бохирдлоороо онцгой анхаарал татаж байна.
Толгойт орчимд нүүрстөрөгчийн дутуу исэл хэвийн хэмжээнээс давжээ
Хэмжилтийн дүнгээр нүүрстөрөгчийн дутуу исэл Толгойт орчмоос хэвийн түвшнээс өндөр гарсан байна. Энэ төрлийн бохирдуулагч нь голчлон тээврийн хэрэгсэл, түлшний бүрэн шаталтгүй байдалтай холбоотойгоор ялгардаг бөгөөд өндөр төвлөрөлтэй үед амьсгалын зам, зүрх судасны эрүүл мэндэд эрсдэл дагуулдаг.
Ийнхүү өнгөрсөн өдрүүдийн агаарын чанарын зураглалаас харахад Нисэх, Зурагт, Мишээл экспо зэрэг хэсэгт агаар илүү цэвэр байгаа бол Хайлааст болон түүнийг дагасан хэд хэдэн бүс утаа, тоосонцрын хувьд хотын хамгийн ачаалалтай, эрсдэлтэй цэгүүдийн нэг болж байна.
