Шинэ технологи ажлын эрчмийг нэмэгдүүлж байгааг судалгаа харуулав
Генератив хиймэл оюун (AI) ажлын процессыг хөнгөвчилж, ажилтнуудад илүү их чөлөөт цаг гаргана гэсэн таамаг одоогоор статистик мэдээллээр батлагдаагүй байна. Харин эсрэгээрээ хиймэл оюуныг бизнесийн үйл ажиллагаанд нэвтрүүлснээр ажилтнуудын ачаалал нэмэгдэж, ажлын эрчим өссөн болохыг шинэ судалгаа харуулжээ.
The Wall Street Journal-ийн мэдээлснээр ActivTrak компанийн хийсэн судалгаанд хиймэл оюун ашиглаж эхэлсэн байгууллагуудад ажлын нягтрал, хурд болон гүйцэтгэж буй ажлуудын төвөгшил нэмэгдсэн байна.
Судалгаанд 1111 ажил олгогч оролцсон бөгөөд 164 мянган ажилтны 443 сая гаруй цагийн ажлын мэдээллийг шинжилжээ. Судалгааны аргачлал нь ажилтнуудын дижитал идэвхийг 180 хоногийн турш хянах зарчимд үндэслэсэн бөгөөд AI нэвтрүүлэхээс өмнөх болон дараах үеийг харьцуулан судалсан байна.
Имэйл, мессежийн ачаалал эрс нэмэгджээ
Хиймэл оюуны хэрэгслүүдийг ашиглаж эхэлсний дараа ажлын эрчим бараг бүх үзүүлэлтээр өссөн байна. Тухайлбал ажилтнуудын:
- имэйл болон чатад зарцуулсан цаг хоёр дахин нэмэгдсэн
- компанийн програмуудад ажиллах идэвх 94 хувиар өссөн
Харин нэг ажил дээр төвлөрч тасралтгүй ажиллах хугацаа ойролцоогоор 9 хувиар буурсан байна. Энэ нь төвлөрөл шаардсан нарийн төвөгтэй ажлууд дээр ажиллах нөхцөл муудсаныг илтгэж байгаа гэж судлаачид тайлбарлажээ.
Сонирхолтой нь хиймэл оюун нэвтрүүлээгүй компаниудад ийм өөрчлөлт ажиглагдаагүй байна.
Чөлөөлөгдсөн цаг шинэ ажлаар дүүрч байна
Судалгааны зохиогчдын үзэж байгаагаар хиймэл оюун зарим ажлыг автоматжуулж, тодорхой хэмжээний цаг хэмнэдэг ч энэ хугацаа бараг тэр дороо шинэ даалгавраар дүүрдэг байна. Үүний улмаас ажлын нийт ачаалал буурахын оронд улам нэмэгддэг аж.
Энэ дүгнэлт нь хиймэл оюуны хөгжил ирээдүйд ажлын цагийг багасгана гэсэн зарим футурологичдын таамаглалтай зөрчилдөж байна. Тухайлбал Илон Маск өмнө нь ойролцоогоор 20 жилийн дараа хиймэл оюуны хөгжлийн ачаар хүмүүс үндсэн хэрэгцээгээ хангахын тулд заавал ажиллах шаардлагагүй болох боломжтой гэж үзэж байсан.
Ажлын эрчим нэмэгдэх нь эрсдэл дагуулж болзошгүй
Хиймэл оюун нэвтрүүлсэн зарим компаниудын удирдлагууд бүтээмж өсөх үед ажилтнуудад илүү олон даалгавар өгөгдөх хандлагатай болдгийг онцолжээ. Үүний үр дүнд ажилтнууд илүү их ачаалалтай, заримдаа илүү урт хугацаанд ажиллах шаардлагатай болдог байна.
Судлаачдын үзэж байгаагаар ажилтнууд шинэ боломжуудыг ашиглан илүү олон ажил хийх “аппетит”-тай болдог. Гэвч урт хугацаанд энэ нь ядаргаа хуримтлагдах, алдаа нэмэгдэх, сэтгэлзүйн ядаргаа үүсэх, ажлын үр дүн буурах зэрэг эрсдэл дагуулж болзошгүй юм.
