Шагналын тайзны хугацааг богиносгосон нь маргаан дэгдээв
Лос Анжелес хотод болсон Академийн шагнал гардуулах ёслолын үеэр Netflix-ийн “Kpop Demon Hunters” энимэйшн кино хоёр том шагнал хүртэж, онцгой амжилт үзүүлсэн ч зохион байгуулагчдын шийдвэр үзэгчдийн шүүмжлэлд өртлөө.
Тус бүтээл “Шилдэг энимэйшн кино” болон “Golden” дуугаараа “Шилдэг киноны дуу” гэсэн хоёр шагналыг хүртсэн байна.
Уран бүтээлчдийн үгийг тасалсан нь шүүмжлэл дагуулав
“Golden” дууны шагналыг гардуулах үеэр эхлээд киноны Huntrix зохиомол хамтлагийн гишүүн Румигийн хоолойг бүтээсэн дуучин EJAE талархлын үгээ илэрхийлжээ. Үүний дараа продюсер И Юү Хан үг хэлж эхлэх үед зохион байгуулагчид түүний яриаг гэнэт тасалж, тайзны хөгжмийг тоглуулсан байна.
Хожим ёслолын бичлэгийг бүтнээр нь үзсэн үзэгчид бусад төрөлд шагнал хүртсэн уран бүтээлчдийн үг хэлэх хугацаа илүү урт байсныг анзаарсан байна.
Тухайлбал, “Best Cinematography” шагналын эзэд тайзан дээр дөрвөн минут орчим үг хэлсэн бол “Golden” дууны багийн хувьд хоёр минут ч хүрээгүй хугацаанд тасалдсан нь тод харагджээ.
Ялгавартай хандсан гэх шүүмжлэл нэмэгдэв
Сошиал орчинд зарим хэрэглэгчид энэхүү ялгааг кино солонгос хэл дээр бүтээгдсэн, мөн Азийн уран бүтээлчдийн оролцоотой байсантай холбон тайлбарлаж, шүүмжилж байна.
Үүнтэй төстэй нөхцөл байдал “Шилдэг энимэйшн кино” шагналыг гардуулах үеэр ч давтагджээ. Найруулагч Мэгги Кан, Крис Аппелханс нар үг хэлсний дараа продюсер Мишел Вон микрофонд ойртох үед мөн адил тайзны хөгжмийг эхлүүлж, яриаг зогсоосон байна.
Кино амжилтаараа шинэ дээд амжилт тогтоосон
Өнгөрсөн оны зун нээлтээ хийсэн “Kpop Demon Hunters” кино саяхан 500 сая үзэлтийн босгыг давж, Netflix платформын түүхэн дээд амжилтыг тогтоосон юм.
Оскарын хоёр шагнал болон дэлхийн хэмжээний үзэлт нь уг бүтээлийг Солонгосын сэдэвтэй энимэйшн кинонууд дундаас хамгийн өргөн хүрээнд амжилт олсон бүтээлүүдийн нэг болгож байна.
