Хойд нутгийг донсолгосон хүчтэй газар хөдлөлт
Афганистаны хойд хэсэгт ням гаргаас даваа гарагт шилжих шөнө 6.3 магнитудын хүчтэй газар хөдлөлт болж, урьдчилсан мэдээллээр 20 хүн амь үрэгдэж, 320 хүн гэмтэж бэртсэн талаар тус улсын Нийгмийн эрүүл мэндийн яамны хэвлэлийн төлөөлөгч Шарафат Заман мэдээллээ.
АНУ-ын Геологийн судалгааны албаны мэдээгээр газар хөдлөлтийн голомт нь Хульм суурингаас баруун өмнө 22 км-ийн зайд, 28 км-ийн гүнд байжээ. Газар хөдлөлт орон нутгийн цагаар 01:59 цагт болсон байна.
Аврах ажиллагаа яаралтай эхэлжээ
Афганистаны Байгалийн гамшгийн уршгийг арилгах агентлагийн мэдээлснээр, Балх болон Саманган мужууд хамгийн их хохирол амссан бөгөөд аврах, яаралтай тусламжийн багууд газар дээр нь ажиллаж эхэлсэн байна.
Батлан хамгаалах яамны мэдээлснээр, аврагчид шархадсан хүмүүсийг эмнэлэгт хүргэж, гамшигт өртсөн гэр бүлүүдэд тусламж үзүүлж байгаа аж. Ихэнх шархадсан иргэд хөнгөн бэртэлтэй байсан бөгөөд анхны тусламжийн дараа эмнэлгээс гарчээ.
“Талибан”-ы засгийн газрын мэдэгдэл
Засгийн газрын хэвлэлийн төлөөлөгч Забихулла Мужахид “X” хуудсаараа дамжуулан мэдэгдэл хийхдээ:
“Балх, Саманган, Баглан мужуудад хүний амь эрсдэж, их хэмжээний эдийн засгийн хохирол учирлаа. Засгийн газрын холбогдох байгууллагууд газар хөдлөлтөд нэрвэгдсэн хүмүүст шаардлагатай тусламжийг яаралтай үзүүлж байна” гэжээ.
Түүхэн сүм эвдэрч, Кабулд ч чичирхийлэл мэдрэгджээ
Газар хөдлөлтийн чичирхийлэл Мазари-Шариф хотод мэдрэгдэж, тус хотын түүхэн дурсгалт Хөх сүмийн хананаас тоосго унасан ч гол бүтэц нь бүрэн үлдсэн байна.
Чичирхийлэл Кабул болон бусад мужуудад ч мэдрэгдсэн бөгөөд Кабул–Мазари-Шарифын хурдны зам хад нурж болзошгүй аюулын улмаас түр хугацаанд хаагдаж, удалгүй дахин нээжээ.
НҮБ тусламжийн ажиллагааг эхлүүлжээ
Афганистан дахь НҮБ-ын салбараас хийсэн мэдэгдэлд дурдсанаар, газар хөдлөлт болсны дараа тус байгууллагын багууд нөхцөл байдлыг үнэлж, яаралтай тусламж үзүүлэхээр газар дээр нь ажиллаж байгаа аж.
“Бид гамшигт нэрвэгдсэн иргэдэд шаардлагатай тусламж, дэмжлэгийг нэн яаралтай хүргэнэ” гэж мэдэгдэлд онцолсон байна.
Давтамжтай гамшгийн эрсдэл
Сүүлийн жилүүдэд Афганистан улс хэд хэдэн хүчтэй газар хөдлөлтөд нэрвэгдэж, олон мянган хүн амь үрэгдээд байна. Байшин барилгуудын ихэнх нь шавар, тоосго, модоор баригдсан тул хүчтэй чичирхийлэлд тэсвэргүй байдаг нь хохирлын хэмжээг нэмэгдүүлдэг гэж мэргэжилтнүүд үздэг.
Энэ оны наймдугаар сард Пакистантай залгаа нутагт болсон 6.0 магнитудын газар хөдлөлтөд 2200 гаруй хүн, харин 2023 оны аравдугаар сарын 7-нд болсон ижил хүчтэй чичирхийлэлд 4000 гаруй хүн амь насаа алдсан билээ.
