“Ахмадын дуу хоолой” хөдөлгөөн өнөөдөр хэвлэлийн хурал хийж, тэтгэврийн хэмжээг нэмэгдүүлэх, ахмад настнуудын амьжиргааг сайжруулах талаар төр, засагт албан ёсоор шаардлага хүргэж байна.
“Тэтгэвэр нэмэхдээ хувь биш, мөнгөн дүнгээр ижил хэмжээгээр нэм”
Хөдөлгөөний төлөөлөгчид хэлэхдээ, ахмад настнуудын тэтгэврийн зөрүүг арилгахын тулд хувьчилсан бус, мөнгөн дүнгээр ижил хэмжээгээр нэмэгдүүлэх шаардлагатай гэж үзэж байна. Тэд “2026 он гэхэд тэтгэврийн доод хэмжээг 1.5 сая төгрөгт хүргэх болон энэ асуудлаар ахмадуудын төлөөллийг оролцуулсан албан ёсны гэрээ, хэлэлцээр байгуулахыг” шаардав.
“Ахмадуудыг үл тоомсорлож байна”
Тэдний хэлснээр, Ерөнхий сайд Г.Занданшатар ахмад настнуудын төлөөлөлтэй уулзахгүй байгаа нь “харамсалтай” үйлдэл бөгөөд Монголын ахмадын холбооны ерөнхийлөгч Ц.Сүхбаатар ахмадуудыг бодитой төлөөлж чадахгүй байна гэж мэдэгдэв.
“Бид 37 хоног Төрийн ордны баруун хаалганы гадна суусан ч хэн ч бидэнтэй уулзаагүй. Төр засаг ард иргэдийнхээ дуу хоолойг сонсох ёстой” хэмээн тэд онцолжээ.
Ахмадуудын гол шаардлагууд
- Тэтгэврийн доод хэмжээг 1.5 сая төгрөгт хүргэх
- Тэтгэврийн зээлийг нэг удаа 36 сарын хугацаатайгаар олгох
- Тэтгэврийн зээлийг хэрэглээний зээлийн ангиллаас гаргах
- 694.9 тэрбум төгрөгийг ахмадуудад тэгш хуваарилах
Тэд эдгээр шаардлагыг 72 цагийн дотор шийдвэрлэхийг Засгийн газраас шаардаж байгаа бөгөөд “Бид таван сар хүлээлээ. Одоо цөхөрч, туйлдаж байна. Төр засаг хариуцлагаа ухамсарлах ёстой” гэж мэдэгдэв.
“1.5 сая төгрөгөөс дээш тэтгэвэртэй ахмадууд зиндаархаж байна”
Мөн ахмад настнуудын төлөөлөл “Өндөр тэтгэвэр авдаг хүмүүс энэ тэмцэл надад хамаагүй гэж бодож болохгүй. Бид бүгд нэг нийгэмд амьдарч байна. Хамгийн доод хэмжээгээр тогтоолгосон тэтгэврээ нэмүүлэх нь амьдралын зайлшгүй шаардлага болжээ” хэмээн нэмж хэлэв.
