АНУ-ын Холбооны нөөцийн сангийн бодлогын хүүгийн талаарх тодорхойгүй байдал, зах зээлийн макро эдийн засгийн эрсдэл нэмэгдсэнтэй холбоотойгоор мягмар гарагт биткоины ханш огцом унаж, 5.2 хувиар буурснаар сүүлийн долоон сарын хамгийн доод түвшинд хүрлээ.
Биткоин 90 мянган ам.долларын “зааг”-аас доош орлоо
Мягмар гаргийн өглөөний байдлаар дэлхийн хамгийн өндөр эрэлттэй криптовалют болох биткоин 90 100 ам.доллар орчимд арилжаалагдаж байсан нь энэ оны дөрөвдүгээр сараас хойш бүртгэгдсэн хамгийн доод ханш болж байна. Өдрийн турш богино хугацаанд ханш нь 90 000 ам.доллароос ч доошилж, сэтгэлзүйн чухал босгыг доош нэвтэлсэн нь хөрөнгө оруулагчдын итгэлд хүчтэй нөлөөлжээ.
“CoinMarketCap” платформын мэдээллээр, сүүлийн 24 цагийн дотор дэлхийн криптовалютын нийт зах зээлийн үнэлгээ 4.5 хувиар агшиж, 3.09 их наяд ам.долларт хүрсэн байна. Ингэснээр биткоины ханш зөвхөн нэг долоо хоногийн дотор 15.3 хувийн уналт үзүүлжээ.
АНУ-ын Ерөнхийлөгч Дональд Трампын зарим хөрөнгө, ашигт ажиллагаанд ногдуулах татварын шийдвэр дэлхийн санхүүгийн зах зээлд доргилт үүсгэсний дараа 2025 оны дөрөвдүгээр сард биткоин нэг үе 74 400 ам.доллар хүртэл унаж байсан нь дахин санагдуулахуйц нөхцөл байдал үүсээд байна.
Эфериум болон крипто зах зээл нийтээрээ дарамтад оржээ
Зах зээлийн үнэлгээгээр биткоины дараа бичигддэг хоёр дахь том криптовалют эфериумын ханш мөн ижил чиг хандлага үзүүлж, 5.4 хувиар буурч 3013 ам.доллар болсон байна.
Крипто зах зээлийг нийтэд нь авч үзвэл, мөнгөний хатуу бодлогын чиглэл тодорхойгүй байгаа нь томоохон дарамт үүсгэжээ. Холбооны нөөцийн сангийн албаныхан бодлогын хүүг хэр хурдтай, ямар түвшинд өөрчлөх талаар байр суурь зөрчилдөөнтэй байгаа нь хөрөнгө оруулагчдыг болгоомжтой хүлээлгийн байдалд оруулж, эрсдэл өндөртэй хөрөнгөөс татгалзах хөдөлгөөнд түлхэц өгч байна.
Шинжээчдийн дүгнэлтээр, макро эдийн засгийн тодорхойгүй байдал, томоохон корпорацууд биткоин зэрэг криптовалютаас алгуур гарч, ашиг олох уламжлалт хөрөнгө оруулалтын хэрэгсэл рүү шилжиж байгаагийн зэрэгцээ крипто зах зээлд итгэх итгэл сулран, ханшийн савлагааг улам гүнзгийрүүлж байгаа аж.
Хөрөнгө оруулагчдын сэтгэл зүйд үзүүлж буй нөлөө
Биткоины ханш урьд нь давж гарсан 100 мянган ам.долларын түвшнээс доош орж, тогтвортой байж чадалгүй байгааг шинжээчид онцолж байна. Энэ нь богино хугацааны ашиг хайгч спекулянтууд төдийгүй урт хугацааны хөрөнгө оруулагчдын сэтгэл зүйд ч тогтвортой бус байдал үүсгэж, эргэлзээг нэмэгдүүлж байна.
Зарим шинжээч богино хугацаанд дахин уналт үргэлжилж болзошгүй гэж анхааруулж байгаа бол нөгөө хэсэг нь мөнгөний бодлогын тодорхой байдал нэмэгдэж, зах зээл шинэ нөхцөл байдалд дасан зохицвол ханш аажмаар тогтворжих боломжтой гэж харж байна.
