Тоглолтын мэдээ гармагц захиалгын “дайн” эхэлжээ
Алдарт BTS хамтлаг дэлхийг тойрсон шинэ аялан тоглолтоо зарласны дараа фенүүд Бусан хотод болох тоглолтын өдрүүдэд байрлах зочид буудлуудаа яаравчлан захиалж эхэлсэн байна. Үүний улмаас эрэлт огцом өсөж, хотын зарим буудал, байрны үнэ богино хугацаанд мэдэгдэхүйц нэмэгдсэн тухай мэдээлэл цахим орчинд тархжээ.
“Ёс зүйгүй” үнийн өсөлтөд гомдол нэмэгдэв
Үнэ хэт өссөнтэй холбоотой гомдол, шүүмжлэл олон нийтийн сүлжээгээр олширч байна. Зарим хэрэглэгчдийн хэлж буйгаар, тоглолтын үеэрх байрны үнэ өмнөхөөсөө 10 дахин нэмэгдсэн тохиолдлууд ажиглагдаж, үүнийг бизнес эрхлэгчдийн шударга бус үйлдэл гэж үзэн бухимдаж буйгаа илэрхийлжээ. Мөн хэсэг хэрэглэгчид өмнөх захиалгыг цуцлуулж, өндөр үнээр дахин санал болгох явдал гарч магадгүй гэх хардлагыг ч дэвшүүлж байна.
Аялан тоглолт 2027 оны гуравдугаар сар хүртэл үргэлжилнэ
BTS хамтлагийн аялан тоглолт ирэх дөрөвдүгээр сараас эхлэхээр мэдээлэгдсэн. Цэргийн албатай холбоотой завсарлагааны дараа хамтлаг эргэн нэгдэж, олон улсын хэмжээний тоглолтын хуваариа эхлүүлсэн бөгөөд энэ удаагийн аялан тоглолт 2027 оны гуравдугаар сард дуусахаар төлөвлөгдөж байгаа талаар дурджээ.
