“Go Mongolia” хөтөлбөрийн эдийн засгийн бодит өгөөж
Монгол Улс түүхэндээ анх удаа 800 мянган жуулчин хүлээн авч, 1.6 тэрбум ам.доллар буюу зургаан их наяд төгрөгийн нэмэлт орлого бүрдүүлсэн нь онцлох амжилт болж байна. Энэ талаар УИХ-ын гишүүн, Соёл, спорт, аялал жуулчлал, залуучуудын сайд асан Ч.Номин байр сууриа илэрхийллээ.
Тэрбээр:
“Төсвийн орлого өнөөдөр 31 их наяд төгрөг гэж тооцогдож байгаа. Үүний 20 хувьтай тэнцэх мөнгийг аялал жуулчлалын салбар зөвхөн нэг жилийн дотор олсон нь Go Mongolia хөтөлбөрийн шууд үр дүн” гэж онцоллоо.
“Go Mongolia” урт хугацааны төлөвлөгөө
- Хөтөлбөрийг 2021–2026 онд хэрэгжүүлэхээр төлөвлөсөн.
- CNN, BBC, Time зэрэг олон улсын томоохон хэвлэл мэдээллийн байгууллагуудтай хамтран ажилласан.
- Монгол Улсыг аялал жуулчлалын хамгийн таатай орнуудын нэгээр нэрлэхэд гол нөлөө үзүүлсэн.
Ч.Номингийн хэлснээр Go Mongolia бол “Монголыг зөвөөр, бодлогын төвшинд олон улсад таниулсан урт хугацааны ажил” юм.
Эдийн засагт үзүүлсэн бусад эерэг нөлөө
- Монголын эдийн засгийн индекс, зээлжих зэрэглэл өссөн.
- Softpower индексийн байрлал 14 хувиар урагшилсан.
- Худалдаа, экспортын хэмжээнд эерэг ахиц гарсан.
Тэрбээр “Ийм тодорхой үр дүнг улстөржүүлж, мушгин гуйвуулж буйд харамсаж байна” хэмээн сэтгүүлчдэд уриаллаа.
Солонгос жуулчдын тоо буурсан ч тогтвортой сурталчилгаа зайлшгүй. Өнгөрсөн зун Өмнөд Солонгосоос ирэх жуулчдын тоо 50 мянгаар буурсан ч Ч.Номингийн үзэж буйгаар “улсаа тогтвортой сурталчилж чадвал урт хугацаанд жуулчдын тоо өсөх нь дамжиггүй” аж.
“The MongolZ” ба улсын шигшээ багийн асуудал
Ярилцлагын төгсгөлд Ч.Номин цахим спортын “The MongolZ” багийн талаар байр сууриа илэрхийллээ.
- 2024–2025 онд багийн хүсэлтийн дагуу улсын шигшээ багт элсүүлсэн.
- Шигшээ багт орсноор тамирчдад олон улсын тэмцээнд оролцох, визний нөхцөл хялбаршуулах, тодорхой хэмжээний цалин болон дэмжлэг авах боломж нээгддэг.
- Тэрбээр “The MongolZ төсвөөс нэг ч төгрөг аваагүй” хэмээн тодотгосон.
Мөн гэр бүлийн хүнийх нь тухайд:
“Манай хүн спортыг олон жил хувиасаа дэмжсэн. Олимп сургууль байгуулж, бөхийн төрөлд олон тамирчин төрүүлсэн. И-спортын холбоог бий болгосон ч үйл ажиллагаанд оролцдоггүй” хэмээн тайлбарлав.
