Монгол Улсын агаарын тээврийн салбар олон улсын тавцанд шинэ амжилт тогтоолоо. 2025 оны “Дэлхийн хамгийн их ахиц гаргасан нисэх буудлуудын жагсаалт”-д Чингис хаан олон улсын нисэх буудал анх удаа багтжээ. Энэхүү нэр хүндтэй жагсаалтыг нисэхийн үйлчилгээний чанар, аюулгүй байдал, дэвшилтэт технологийн шийдлийг үнэлж гаргадаг олон улсын Skytrax байгууллага жил бүр танилцуулдаг.
Чингис хаан нисэх буудал Казахстаны Алматы, Тайландын Бангкок Суваннапум, Их Британийн Лондон Гатвик, Тайванийн Таоюань зэрэг бүс нутгийн гол төвүүдтэй мөр зэрэгцэн жагсаалтад багтсан нь манай улсын хувьд агаарын тээврийн салбар дахь анхны түүхэн амжилт юм.
2021 онд ашиглалтад орсноос хойш тус буудал нь зорчигчийн үйлчилгээ, дэд бүтэц, технологийн шийдлийг шат дараатай сайжруулж иржээ. 2024 оноос эхлэн автомат бүртгэлийн систем, зорчигчийн урсгал удирдлагын ухаалаг шийдэл, мэдээллийн самбар зэрэг шинэчлэлүүдийг нэвтрүүлсэн нь олон улсын үнэлгээний байгууллагуудаас өндөр үнэлгээ авах нөхцөлийг бүрдүүлсэн. Түүнчлэн зорчигчийн нэвтрэх процессыг хялбарчлах “One ID” системийг үе шаттай хэрэгжүүлж байгаа нь үйл ажиллагааны аюулгүй байдал, үр ашгийг нэмэгдүүлэх чухал алхам болжээ.
Skytrax-ийн мэдэгдсэнээр 2025 оны жагсаалтад багтсан буудлууд сүүлийн жилүүдэд зорчигчийн туршлагыг эрс өөрчилж, дэд бүтцээ шинэлэг түвшинд хүргэсэн, үйлчилгээгээ эрс сайжруулсан байгаараа онцлог. Жагсаалтыг Германы Берлиний Бранденбург тэргүүлж, түүнчлэн Алматы, Бангкок, Лондон Гатвик, Филиппиний Себу, Доминиканы Пунта Кана, Энэтхэгийн Мумбай зэрэг дэлхийн өнцөг булан дахь гол зангилаа буудлууд багтжээ.
Монголын иргэний нисэхийн салбар сүүлийн жилүүдэд шинэ шатанд гарч, бүс нутгийн агаарын тээврийн гол төв болох зорилгыг дэвшүүлэн ажиллаж байна. “Нью Улаанбаатар Интернэйшнл Эйрпорт” ХХК болон Иргэний нисэхийн ерөнхий газрын хамтын ажиллагааны хүрээнд нислэгийн тоог нэмэгдүүлэх, олон улсын нислэгийн операторуудыг татах, аялал жуулчлалын шинэ чиглэлүүдийг нээх зэрэг бодлого, стратегиуд амжилтад хүрч, энэ удаагийн нэр хүндтэй шалгаруулалтад нөлөөлсөн нь тодорхой.
Чингис хаан нисэх буудлын 2025 оны энэхүү амжилт нь зөвхөн дэд бүтцийн шинэчлэл бус, менежмент, стандарт, хэрэглэгчийн туршлагын хувьд дэлхийн түвшинд ойртож буйн тод илрэл бөгөөд цаашид бүс нутгийн өрсөлдөөнт нисэх буудлуудын нэг болоход чухал суурь тавигдаж байна.
