Чихрийн шижин болон бусад шалтгаанаар цусан дахь сахарын түвшин тогтмол өндөр байх нь шүд цоорох эрсдэлийг нэмэгдүүлдэг болохыг Осакагийн их сургуулийн судлаачид тогтоожээ. Тэдний дүгнэлтээр, цусанд ихэссэн сахар шүлсэнд шилжих үед амны хөндийн бичил орчин өөрчлөгдөж, шүд цооролт үүсэх нөхцөл эрчимждэг байна.
Сахар яагаад шүдэнд нөлөөлдөг вэ
Судалгаанд цусан дахь сахар удаан хугацаанд өндөр хэвээр байх үед глюкоз, фруктоз зэрэг сахарууд цуснаас шүлсэнд илүү их хэмжээгээр дамжин ордог болох нь ажиглагджээ. Шүлсэн дэх сахар ихсэх нь:
- шүдний өнгөр үүсэх боломжийг нэмэгдүүлэх
- шүд цооролт үүсэх эрсдэлийг өсгөх
гэх холбоотой байсныг судалгааны баг тайлбарласан байна.
Судалгааг хэрхэн хийсэн бэ
Ахлах багш Акито Саканакагийн удирдсан баг чихрийн шижинтэй болон шижингүй нийт ойролцоогоор 60 хүнийг хамруулжээ. Туршилтад оролцогчдоос шүлсний булчирхайгаас шинээр ялгарч буй “булчирхайн шүлс”-ийг цуглуулж, цуснаас гаралтай сахар болон бодисын солилцооны бүтээгдэхүүнүүд хэрхэн шүлсэнд шилжиж байгааг шинжилсэн байна.
Амны хөндийн нянгийн тэнцвэр алдагдаж, хүчил үүсэлт нэмэгддэг
Шүдний өнгөрийн шинжилгээгээр цусан дахь сахар өндөр хүмүүсийн аманд:
- шүд цооруулахтай холбоотой нянгийн тоо нэмэгдэх
- амны хөндийн эрүүл байдлыг дэмждэг нянгийн тоо буурах
өөрчлөлт илэрсэн байна. Үүний улмаас амны хөндийн бичил орчин сахарыг задлан хүчил үүсгэх чиглэл рүү хэлбийж, шүдний пааланг сулруулж, цоорол үүсэх нь амархан болдог гэжээ.
Сахараа хянахад шүлсэн дэх сахар буурч, бичил орчин сайжирсан
Судалгаанд хамрагдсан чихрийн шижинтэй зарим өвчтөн эмнэлэгт хэвтэн эмчлүүлж, цусан дахь сахараа хяналтад оруулах үед шүлсэн дэх сахарын хэмжээ буурч, амны хөндийн нянгийн тэнцвэр сайжирсан байна. Үүний нэг шинж нь шүд цооруулахтай холбоотой нян багасаж, харин амны хөндийн эрүүл байдалд эерэг нөлөөтэй нян нэмэгдсэн явдал гэж судлаачид онцолжээ.
Эдгээр өөрчлөлт шүдний ямар нэг эмчилгээ хийлгүйгээр гарсан нь цусан дахь сахарыг үр дүнтэй хянах нь амны хөндийн эрүүл мэндийг сайжруулахад өндөр магадлалтайг харуулж байна.
Судлаачдын байр суурь
“Цусан дахь сахарын түвшин шүд цооролтод нөлөөлдгийг бид тогтоосон” гэж Саканака хэлжээ. “Цаашид шүлсээр дамжин нийлүүлэгдэж буй сахарын хэмжээ болон түүний эрүүл хүмүүст үзүүлэх нөлөөг судлахыг хүсэж байна” гэдгээ мөн нэмж хэлжээ.
Тус судалгаа өнгөрсөн оны сүүлчээр олон улсын Microbiome сэтгүүлд хэвлэгдсэн байна.
