Нийслэлийн Засаг даргын захирамжийн дагуу 2025 оны аравдугаар сарын 20-ны даваа гарагаас эхлэн Улаанбаатар хотын нутаг дэвсгэрт скүтер, мопед, цахилгаан дугуйг замын хөдөлгөөнд оролцуулахгүй байхаар боллоо.
Аюулгүй байдлын үүднээс авч буй арга хэмжээ
Нийслэлийн Засаг даргын Тамгын газрын мэдээлснээр, энэхүү шийдвэрийг замын хөдөлгөөнд оролцогчдын аюулгүй байдлыг хангах болон зам тээврийн ослын тоог бууруулах зорилгоор гаргажээ. Хязгаарлалт 2025 оны 10 дугаар сарын 20-ноос 2026 оны 4 дүгээр сарын 10 хүртэл үргэлжлэх юм.
Захирамжийн үндэслэл
Нийслэлийн Засаг даргын А/1453 тоот захирамж нь “Монгол Улсын засаг захиргаа, нутаг дэвсгэрийн нэгж түүний удирдлагын тухай хууль”, “Гэмт хэрэг, зөрчлөөс урьдчилан сэргийлэх тухай хууль”, мөн “Замын хөдөлгөөний аюулгүй байдлын тухай хууль”-ийн холбогдох зүйл, заалтуудыг үндэслэж гарсан байна.
Цахилгаан тээврийн хэрэгслийн бүртгэл, хяналт
Хязгаарлалт хэрэгжих хугацаанд холбогдох байгууллагуудыг:
- техникийн шаардлагыг хангасан мотоцикл, мопедыг бүртгэх,
- улсын бүртгэлийн дугаар олгох,
- түрээслүүлэгч байгууллагуудтай гэрээ байгуулах зэрэг ажлыг зохион байгуулахыг үүрэг болгожээ.
Энэхүү арга хэмжээ нь иргэдийн аюулгүй байдлыг хамгаалахын зэрэгцээ ирэх хавраас цахилгаан тээврийн хэрэгслийг илүү хяналттай, зохион байгуулалттайгаар ашиглах нөхцөлийг бүрдүүлэх зорилготой юм.
