Ерөнхий сайд Дэлхийн эдийн засгийн чуулганд оролцож байна
Швейцарын Давос хотноо үргэлжилж буй 56 дахь удаагийн Дэлхийн эдийн засгийн чуулганд Монгол Улсын Ерөнхий сайд Г.Занданшатар оролцож байна.
Засгийн газрын бодлого, 2026–2030 оны төлөвлөгөөг танилцууллаа
Чуулганы үеэр Ерөнхий сайд Г.Занданшатар Дэлхийн өөрчлөлтийн төлөөх Тони Блэйр хүрээлэнг үүсгэн байгуулагч, Британийн Ерөнхий сайд асан Тони Блэйртэй уулзаж ярилцав. Тэрбээр Засгийн газрын бодлого, үйл ажиллагаа болон Монгол Улсын 2026–2030 оны хөгжлийн төлөвлөгөөг танилцуулсан байна. Мөн эдийн засгийг төрөлжүүлэх, бүтээмжийг нэмэгдүүлэх зорилгоор хиймэл оюун ухаан, технологийг бодитой, системтэй нэвтрүүлэх чиглэлээр ажиллаж буйгаа онцоллоо.
Олон нийттэй харилцах ба UNCCD COP17-ийн бэлтгэлийг хэлэлцэв
Уулзалтаар Тони Блэйрийн хүрээлэнтэй стратегийн түвшинд олон нийттэй харилцах чиглэлээр, мөн Цөлжилттэй тэмцэх тухай НҮБ-ын Конвенцын талуудын 17 дугаар бага хурлын зохион байгуулалтын асуудлаар санал бодлоо солилцжээ. Талууд цаашид хамтран ажиллах боломжийг судлахаар тохиролцсон байна.
Тони Блэйрийг Монголын эдийн засгийн форум болон COP17-д урив
Ерөнхий сайд Г.Занданшатар Тони Блэйрийг энэ оны зургаадугаар сард болох Монголын эдийн засгийн форумд, мөн наймдугаар сард зохион байгуулах Цөлжилттэй тэмцэх тухай НҮБ-ын Конвенцын талуудын 17 дугаар бага хуралд оролцохыг урьсан байна.
