Дорнод аймгийн Хэрлэн сумын 11 дүгээр багт орших орон сууцны байрны зургаан дахь давхрын дээвэр дээр 13 настай охин амиа хорлохыг завдсан тохиолдол бүртгэгджээ.
Аймгийн Онцгой байдлын газарт хоёрдугаар сарын 26-ны 18:02 цагт холбогдох дуудлага ирсний дагуу Эрэн хайх, аврах ангийн алба хаагчид дөрвөн минутын дотор, 18:06 цагт хэргийн газарт хүрчээ.
Газар дээр нь очсон аврагчид дээврийн хэсэгт гарсан охиныг яаралтай ятган тайвшруулж, аюулгүй байдлыг хангасны дараа буулгахад амжилттай болжээ. Үүний үр дүнд нэг иргэний амь нас аврагдсан байна.
Одоогоор охинд сэтгэлзүйн дэмжлэг үзүүлэх болон нөхцөл байдлыг тодруулах ажлыг холбогдох байгууллагууд хамтран явуулж байна.
