Нийтийн тээврийн шинэ систем — илүү ухаалаг, илүү хялбар
Нийтийн тээврийн бодлогын газраас мэдээлснээр нийслэлийн нийтийн тээврийн төлбөрийн систем шинэчлэгдэж, зорчигчдын хувьд илүү хялбар, дэвшилтэт төлбөрийн шийдэл хэрэгжиж эхэлжээ.
Шинэ системийн гол онцлог нь бүх төрлийн банкны картыг уншиж, төлбөрийг автоматаар тооцох боломжтой болсон явдал юм. Үүнтэй зэрэгцэн гадаадын иргэдийн виза карт ашиглан төлбөр төлөх боломж нээгдсэн нь жуулчид болон гадаад иргэдийн зорчих үйл явцыг илүү хялбар болгож байна.
Автобусны мэдээллийг гар утсаараа хянах боломжтой боллоо
Шинэ систем нь зөвхөн төлбөрийн шийдэлд бус, автобусны хөдөлгөөний мэдээлэлд ч шинэчлэл авчирсан байна. Зорчигчид гар утасны аппликейшн ашиглан тухайн чиглэлийн автобус хаана яваа, дүүргэлтийн түвшин ямар байгааг бодит цагийн горимоор шалгах боломжтой.
Өдөр бүр 1,100 гаруй автобус нийслэлчүүдэд үйлчилж байна
Одоогийн байдлаар нийслэл хотод 1,178 автобус өдөр бүр иргэдэд үйлчилж, өнгөрсөн долоо хоногт нийт 3.6 сая гаруй зорчилт хийгджээ.
Нийтийн тээврийн шинэчлэл нь бэлэн мөнгөгүй, дижитал төлбөрийн системд шилжих чухал алхам гэж салбарын мэргэжилтнүүд үзэж байна.
