Наймдугаар сарын 20-нд Сэлэнгэ аймгийн цагдаагийн газарт “Баруунбүрэн сумын нутаг дэвсгэрт Бүгд Найрамдах Герман улсын иргэнийг үл таних морьтой этгээд зодож, эд зүйлсийг нь дээрэмдсэн” гэсэн дуудлага бүртгэгджээ.
Мэдээллийн дагуу нутаг дэвсгэр хариуцсан цагдаагийн алба хаагчид шуурхай эрэн сурвалжлах ажиллагаа явуулсан байна. Үүний үр дүнд гадаадын иргэний биед хүч хэрэглэж, заналхийлэн дээрэмдсэн байж болзошгүй этгээдийг илрүүлэн саатуулжээ. Одоогоор уг хэрэгт мөрдөн шалгах ажиллагаа үргэлжилж байна.
Цагдаагийн Ерөнхий Газраас аялал жуулчлалын салбарт үйл ажиллагаа эрхэлдэг байгууллага, иргэдэд хандан Монголд зорчиж буй гадаадын жуулчдын аюулгүй байдлыг хангаж, гэмт хэрэг, зөрчилд өртөхөөс урьдчилан сэргийлэхэд онцгойлон анхаарч ажиллахыг зөвлөжээ.
