УИХ-ын Төсвийн байнгын хорооны дарга Хүрэлбаатарын Ганхуяг өнөөдөр Монгол Улсын Шадар сайдаар албан ёсоор томилогдлоо. Түүнийг Шадар сайдын албан тушаалд томилох саналыг Ерөнхий сайд Г.Занданшатар энэ сарын 7-нд УИХ-ын дэд даргад өргөн мэдүүлсэн юм.
С.Амарсайханы оронд томилогдов
Шадар сайдын үүргийг гүйцэтгэж байсан С.Амарсайхан 2025 оны аравдугаар сарын 29-нд Засгийн газрын хуралдаанд албан тушаалаасаа чөлөөлөгдөх хүсэлтээ танилцуулж, Ерөнхий сайд уг хүсэлтийг нь хүлээн авсан байдаг.
Ийнхүү Ерөнхий сайдын саналын дагуу Х.Ганхуяг өнөөдрөөс эхлэн Шадар сайдын албан үүргийг хүлээн авч, Төсвийн байнгын хорооны даргын ажлаа хүлээлгэн өгч байна. Түүнийг чөлөөлөх асуудлыг тус хороонд хэлэлцэж, дараа нь УИХ-ын нэгдсэн хуралдаанд танилцуулах юм.
Улсын төсвийн хэлэлцүүлгийн үеэр анхаарал татсан үйл явдал
Х.Ганхуяг 11-р сарын 10-нд 2026 оны улсын төсвийг хэлэлцэх үеэр байнгын хорооны гишүүдэд санал өгөх чиглэл өгч, “улаан” болон “ногоон” өнгийн лаазаар ямар санал гаргахыг харуулсан нь улс төрийн хүрээнд анхаарал татсан. Энэ үйлдэл нь Засгийн газрын байр суурийг УИХ-ын гишүүдэд дамжуулсан гэж зарим ажиглагч үзэж байгаа ч Х.Ганхуяг тухайн үед Шадар сайдын томилгоонд нэр дэвшсэн гэдгийг албан ёсоор зарлаагүй байв.
Улс төрийн сонирхолтой эргэлт
Сонирхолтой нь, Х.Ганхуяг өнгөрсөн аравдугаар сард УИХ-ын гишүүн П.Сайнзоригийн санаачилсан Ерөнхий сайд Г.Занданшатарыг огцруулах бичигт гарын үсэг зурсан ч, 10-р сарын 17-ны санал хураалтаар “Огцруулахыг дэмжихгүй” гэж санал өгсөн байдаг.
Үүний дараагаар тэр Засгийн газрын төсвийн бодлогыг дэмжиж, 2026 оны улсын төсвийг хугацаанд нь батлуулахад гол үүрэг гүйцэтгэсэн бөгөөд үүнийхээ дараа Шадар сайдын албан тушаалд томилогдсон байна.
