Кембрижийн судлаачид хиймэл оюун ухаант тоглоомд илүү хатуу хяналт шаардлагатайг анхааруулав
Кембрижийн их сургуулийн судлаачид бага насны хүүхдэд зориулсан хиймэл оюун ухаанд суурилсан тоглоомуудын нөлөөг судалж, энэ салбарт илүү нарийн зохицуулалт хэрэгтэй байгааг анхааруулжээ. Тэдний үзэж байгаагаар ийм тоглоомууд хүүхдийн сэтгэл хөдлөлийг буруу ойлгож, зарим тохиолдолд тохиромжгүй хариу өгч болзошгүй байна.
Судалгааны хүрээнд 3–5 настай хүүхдүүд “Габбо” (Gabbo) нэртэй тэврэх зориулалттай тоглоомтой хэрхэн харилцаж байгааг ажигласан байна. Өнөөдөр зах зээл дээр 3 настай хүүхдэд зориулагдсан хиймэл оюун ухаанд суурилсан тоглоомууд аль хэдийн худалдаалагдаж байгаа ч сургуулийн өмнөх насны хүүхдүүдэд үзүүлэх нөлөөг нарийвчлан судалсан судалгаа маш цөөн хэвээр байна.
Судлаачид дэлхий даяар хийгдсэн холбогдох судалгаануудыг шалгахад ердөө долоон судалгаа олдсон бөгөөд хүүхдүүд өөрсдөө тоглоомтой хэрхэн харилцаж байгааг төвд нь тавьсан судалгаа огт байгаагүй аж.
“Габбо” тоглоом хүүхдийн яриаг ойлгоход бэрхшээлтэй байв
“Габбо” тоглоом нь OpenAI-ийн дуу хоолойд суурилсан хиймэл оюун ухааны чатбот агуулдаг. Түүний зорилго нь хүүхдүүдтэй ярилцаж, төсөөллийн тоглоомд оролцох замаар харилцааг дэмжих юм.
Гэвч туршилтын явцад хүүхдүүд уг тоглоомтой тогтвортой, ойлгомжтой харилцахад хүндрэлтэй байсан нь ажиглагджээ. Тоглоомын үйлдэлд дараах асуудлууд илэрсэн байна.
- Хүүхдүүдийн яриаг тасалж, бүрэн ойлгохгүй байх
- Хүүхдийн яриаг давж, зэрэгцэн ярьж эхлэх
- Хүүхдийн болон насанд хүрэгчдийн хоолойг ялгаж чадахгүй байх
- Хайр, дотно мэдрэмж илэрхийлсэн үгэнд тохиромжгүй хариу өгөх
Жишээлбэл, таван настай хүүхэд “Би чамд хайртай” гэж хэлэхэд тоглоом:
“Сануулахад, харилцаа нь зааврын дагуу байх ёстой. Та дараа нь яахыг хүсэж байна вэ?” гэж хариулжээ.
Судалгааны хамтран зохиогч доктор Эмили Гүүдакр “Ийм тоглоомууд хүүхдийн сэтгэл хөдлөлийг буруу ойлгож эсвэл тохиромжгүй хариу өгч магадгүй” гэж анхааруулсан байна.
Хүүхдийн сэтгэлзүйн аюулгүй байдлыг анхаарах шаардлагатай
Туршилтын үеэр нэг гурван настай хүүхэд “Би гунигтай байна” гэж хэлэхэд “Габбо” тоглоом:
“Битгий санаа зов! Би баяртай бяцхан бот. Хөгжилтэй байцгаая. Дараа нь юу ярилцах вэ?” гэж хариулжээ.
Судлаачид ийм төрлийн хариу хүүхдийн мэдэрч буй гунигийг үл тоомсорлож байгаа мэт ойлголт төрүүлж болзошгүй гэж үзсэн байна.
Судалгаанд оролцсон профессор Женни Гибсон “Өмнө нь бид хүүхдийн тоглоомын физик аюулгүй байдлыг л анхаардаг байсан. Харин одоо сэтгэлзүйн аюулгүй байдлыг ч бодох хэрэгтэй” гэж онцолжээ.
“Габбо” тоглоомын ард хэн байдаг вэ
“Габбо” тоглоомыг Curio компани бүтээсэн бөгөөд тус компани өмнө нь дуучин Граймстай хамтран ажиллаж байсан. Граймс нь бизнес эрхлэгч Илон Маскийн хуучин хамтрагч гэдгээрээ олонд танигдсан юм.
Судлаачид цаашид хиймэл оюун ухаанд суурилсан тоглоомууд хүүхдийн сэтгэлзүйд хэрхэн нөлөөлж байгааг илүү өргөн хүрээнд судлах шаардлагатай гэж үзэж байна.
