Хиймэл оюун ухааныг нийслэлийн зарим ажлын байранд нэвтрүүлнэ

Замын хөдөлгөөн, хотын удирдлагад ухаалаг систем ашиглана

Улаанбаатар хот 2025 онд хиймэл оюун ухаанд суурилсан хяналтын системийг өргөн хүрээнд ашиглаж эхэлж байна. Одоогоор 176 уулзвар, гарцад 2600 гаруй ухаалаг камер суурилуулсан бөгөөд энэ нь зам тээврийн осол, зөрчлийг бууруулах, хууль хэрэгжилтийг хангах, иргэдийн аюулгүй байдлыг хамгаалахад чиглэжээ.

Хотын даргын чиглэл: Хиймэл оюун ухааныг ажлын байранд ашиглах

Нийслэлийн удирдах ажилтнуудын зөвлөгөөний үеэр Хотын дарга Х.Нямбаатар дараах үүргийг өгчээ:

“Нийслэлийн зарим ажлын байранд хиймэл оюун ухааны дэвшлийг ашиглан ажлаа хөнгөвчлөх, шуурхайлах чиглэлд анхаарах шаардлагатай. Техник, технологийн хурдацтай өсөлтөд нийцэж ажиллах ёстой. Тайлан, тооцоо гаргах, бэлэн өгөгдөл дээр суурилсан ажилд хиймэл оюуныг түлхүү нэвтрүүлэх нь зүйтэй.”

Тэрбээр хиймэл оюун ухаан нь зарим ажлын байрны үйл ажиллагааг хөнгөвчлөх, автоматжуулах, цаашлаад хүний хөдөлмөрийг тодорхой хэмжээнд орлох боломжтойг онцолсон байна.

Түгжрэлийг бууруулах шинэ шийдэл

Улаанбаатар хотын авто замын түгжрэлийг бууруулах хүрээнд Их Британийн “Skyral” компани-тай хамтран ажиллаж эхэлжээ. Хэлэлцээрийн дагуу их өгөгдөлд суурилсан хиймэл оюун ухааны загварчлал ашиглан дараах төслүүдийн инженерингийн төлөвлөлт хийгдэнэ:

• Туулын хурдны зам
• Тойрог хурдны зам
• Метро, трамвайны сүлжээ

Эдгээр төслүүд нь хиймэл оюун ухааны анализ, урьдчилсан загварчлалд тулгуурлан хотын дэд бүтцийг оновчтой төлөвлөхөд чиглэж байгаа аж.