Нэмэлт тарифыг хойшлуулсан тухай мэдэгдэл
Хятадаас импортлох хагас дамжуулагчид нэмэлт татвар ногдуулах арга хэмжээг 2027 оны зургаадугаар сар хүртэл хойшлуулна гэж АНУ-ын Худалдааны төлөөлөгчийн газар мягмар гарагт мэдэгдэв. Нэг жилийн хяналт шалгалтын үр дүнгээр гарсан уг шийдвэр нь АНУ, Хятадын хоорондын зөрчил намжрах шинж ажиглагдаж буй үеэр тохиож байна.
301 дүгээр заалтын шалгалтын дүгнэлт ба 0 хувийн хугацаа
Худалдааны төлөөлөгчийн газрын тайлбарт дурдсанаар, АНУ-ын 1974 оны худалдааны хуулийн 301 дүгээр заалтын хүрээнд хийсэн шалгалтаар Хятад улс “давамгайлахын тулд хагас дамжуулагчийн салбарыг онилж байгаа нь бодлогогүй үйлдэл бөгөөд АНУ-ын худалдаанд дарамт учруулж, хязгаарлаж байгаа тул арга хэмжээ авах боломжтой” гэж дүгнэжээ. Гэсэн хэдий ч нэмэлт тарифын анхны хэмжээг 18 сарын турш 0 хувиар хэвээр хадгална. Улмаар татварын хэмжээг 2027 оны зургаадугаар сарын 23-нд өмнө зарласан түвшинд хүртэл нэмэгдүүлнэ гэж тусгасан байна.
Шалгалт эхэлсэн хугацаа, хамрах бүтээгдэхүүн
Энэхүү шалгалтыг 2024 оны 12 дугаар сард Ерөнхийлөгч Жо Байдены засаг захиргааны сүүлийн долоо хоногуудад, өөрөөр хэлбэл Д.Трамп Цагаан ордонд эргэн ирэхээс өмнөх үед эхлүүлжээ. Холбогдох албаныхан судалгаандаа Хятадад үйлдвэрлэсэн автомашинаас эхлээд эмнэлгийн хэрэгсэл зэрэг өдөр тутмын бараа бүтээгдэхүүнд өргөн ашиглагддаг, дэвшилтэт бус чипүүдийг голлон хамруулсан байна.
301 дүгээр заалтын хэрэглээ ба өмнөх жишиг
301 дүгээр заалт нь гадаад улсын шударга бус гэж үзсэн үйл ажиллагаанд хариу арга хэмжээ авахын тулд тариф хэрэглэх эрхийг АНУ-ын Засгийн газарт олгодог. Д.Трамп ерөнхийлөгчийн эхний бүрэн эрхийн хугацаандаа Бээжинтэй худалдааны дайн эхлүүлэхдээ уг заалтыг ашиглан Хятадын импортын бараанд өндөр тариф ногдуулах шийдвэрээ үндэслэдэг байсан юм.
Одоогийн 50 хувийн татвар дээр шинээр нэмж тооцохоор тусгав
301 дүгээр заалтын хүрээнд хийгдсэн тусдаа шалгалтын үндсэн дээр Ж.Байдены засаг захиргаа энэ оны нэгдүгээр сард Хятадын чипийн татварыг хоёр дахин өсгөн 50 хувь болгосон. Мягмар гарагт нийтэлсэн мэдэгдэлд дурдсанаар, төлөвлөсөн шинэ тарифыг одоогийн 50 хувийн татвар дээр нэмж ногдуулах зохицуулалттай байна.
Хятадтай харилцааны уур амьсгал, эвлэрлийн тохиролцоо
Шинээр татвар ногдуулах хугацааг хойшлуулсан нь Д.Трамп 10 дугаар сарын сүүлчээр Өмнөд Солонгост БНХАУ-ын дарга Ши Жиньпинтэй уулзсаны дараа Хятадтай сайн харилцаагаа хадгалахыг эрмэлзэж буйтай давхцаж байна. Мөн ирэх дөрөвдүгээр сард Хятадад айлчлахаар төлөвлөж буй Д.Трамп болон Хятадын удирдлага уг уулзалтын үеэр худалдааны дайнд нэг жилийн хугацаатай эвлэрэхээр тохиролцсон гэж мэдээлжээ.
232 дугаар заалтын өөр шалгалт ба 100 хувийн тарифын мэдэгдэл
Чипийн үйлдвэрлэлийг АНУ-д эргүүлэн төвлөрүүлэх зорилгын хүрээнд Д.Трампын засаг захиргаа 1962 оны Худалдааны өргөжилтийн тухай хуулийн 232 дугаар заалтын дагуу дөрөвдүгээр сард өөр нэг шалгалт эхлүүлсэн байна. Наймдугаар сард Д.Трамп чипийн импортод ойролцоогоор 100 хувийн тариф ногдуулж, шинэ татварын хэмжээг удахгүй зарлана гэж хэлсэн ч одоогоор ийм арга хэмжээ хэрэгжээгүй байна.
