Твиттерийг авсантай холбоотой маргааны шүүх хуралд оролцов
Лхагва гарагт тэрбумтан Илон Маск өөрийнх нь эсрэг гомдол гаргасан Твиттерийн хувьцаа эзэмшигчдийн шүүх хуралд оролцжээ. Тэр 2022 онд тус компанийг худалдан авч, нэрийг нь Х болгон өөрчилсөн. Үүнийг хийх явцдаа Твиттерийн хувьцааны ханшийг зориудаар унагаж, үнэт цаасны тухай хуулийг зөрчсөн гэж хэсэг хувьцаа эзэмшигчид үзэж, шүүхэд хандсан байна.
Шүүхийн гадаа сэтгүүлчдийг анхаарал сарниулах арга хэрэглэв
Өчигдөр Сан Франциско хотын холбооны шүүхийн байрны гадаа Маскийн зургийг авах гэсэн зураглаачид, сэтгүүлчид цугларчээ. Энэ үед нэг Тесла брэндийн автомашин шүүхийн байрны гадаа ирж зогсоход хамгаалагчид тойрч, нөхцөл байдлыг хяналтдаа авсан байна. Хэвлэлийнхэн тэр машиныг Маск ирж байгаа гэж үзэн бүх анхаарлаа тийш төвлөрүүлэхэд, үүнээс хэдхэн метрийн зайд зогссон өөр нэг SUV загварын автомашинаас Маск хамгаалагчдын хамт гарч ирээд шүүхийн хаалгаар яаран оржээ.
“Тэр биднээс 100 футийн зайд л байсан байх. Бид түүнийг өөр автомашинаас буухыг анзаарсан. Тэр машинаас буугаад хаалгаар ороход гуравхан секунд л болсон байх” гэж Блүүмбэргийн зураглаач Дэвид Моррис ярьсан байна.
Дүрс бичлэг тарж, шүүхийн дараах хүлээлт чангарав
Энэ үйл явдлын дүрс бичлэгийг NBC сувгийн сэтгүүлч Скотт Бадмэн сошиал хуудсандаа нийтэлснээр “анхаарал сарниулах машин” ашигласан үйлдэл нь олны ярианы сэдэв болжээ. Үүний дараа сэтгүүлчид шүүх хурал дуусах үед Маск гарч ирэх мөчийг алдалгүй зураг авахын тулд дахин хүлээж эхэлсэн байна. Энэ удаад тэд өмнөхөөсөө “сэрэмжтэй” болж, шүүхийн хаалга бүр дээр зураглаачдыг давхар байрлуулжээ.
