Оросын холимог тулааны од Ислам Махачев UFC-гийн хагас дунд жингийн аварга цолоо АНУ-ын Цагаан ордонд болох тусгай тэмцээний үеэр хамгаалах сонирхолтой байгаагаа албан ёсоор мэдэгдэв.
Ялалтын дараах мэдэгдэл
Ням гарагт болсон аваргын тулаанд Австралийн тулаанч Жек Делла Маддаленаг ялсныхаа дараа Махачев микрофонд ийн хэлжээ: “Цолоо би хэзээ хамгаалах вэ? Дональд Трамп, Цагаан ордноо нээгээрэй, би очиж байна”.
Өмнө нь тэрбээр 2022 оны 10 дугаар сараас 2025 оны 5 дугаар сар хүртэл UFC-гийн хөнгөн жингийн аварга байсан бөгөөд хагас дунд жингийн ангилалд шилжихээр цолоо чөлөөлсөн юм.
Цагаан ордны тэмцээний төлөвлөгөө
АНУ-ын тусгаар тогтнолын 250 жилийн ойг тохиолдуулан UFC-гийн тэмцээнийг Цагаан ордны талбайд зохион байгуулах төлөвлөгөөг Ерөнхийлөгч Дональд Трамп өнгөрсөн 7 дугаар сард зарласан. Тэмцээнийг ирэх 2026 оны 7 дугаар сарын 14-нд хийхээр товложээ.
Түүхэн амжилтууд
Ислам Махачев UFC-гийн хоёр өөр жингийн ангилалд (хөнгөн болон хагас дунд жин) аварга цол хүртсэн Оросын анхны тулаанч, нийтдээ түүхэн дэх 11 дэх тамирчин боллоо. Тэрбээр одоогоор 16 тулаанд дараалан ялж байгаа бөгөөд энэ нь UFC-гийн домогт Андерсон Силвагийн дээд амжилтыг тэнцүүлсэн үзүүлэлт юм.
Өдгөө 34 настай Махачев MMA-д нийт 28 ялалт, ганцхан ялагдалтай (2015 онд Адриан Мартинст хожигдсон).
