2025 оны зургаадугаар сарын 9-нөөс 13-ны хооронд Прокурорын байгууллагаас хэрэг бүртгэлт болон мөрдөн байцаалтын явцад хяналт тавих ажиллагааг эрчимтэй гүйцэтгэж, нийт 54,140 эрүүгийн хэрэгт хяналт тавьсан байна. Энэ хугацаанд гэмт хэргийн шинжтэй нийт 1,157 гомдол, мэдээлэл бүртгэгдэж, шинээр 621 хэрэг нээсэн бол 183 хэрэгт яллах дүгнэлт үйлдэн шүүхэд шилжүүлжээ.
Шүүхэд шилжүүлсэн хэргийн дотор олон нийтийн анхаарлыг татсан, ноцтой тохиолдлууд багтсан бөгөөд үүнд:
Гаалийн ерөнхий газрын харьяа Гашуунсухайт дахь гаалийн газрын байцаагч Х.Н нь Цагаан хад дахь нүүрс тээврийн урсгалыг саадгүй явуулах зорилгоор хахууль авсан хэрэгт холбогджээ. Түүнийг Эрүүгийн хуулийн 22.1 дүгээр зүйлийн 2 дахь хэсгийн дагуу шүүхэд шилжүүлсэн байна.
Мөн Баян-Өлгий аймаг дахь Монголбанкны салбарын нэгэн албан тушаалтан нь мэргэшсэн ажилтны шалгалтыг тэнцсэн мэтээр бүртгүүлж, бусдад хахууль өгсөн хэрэгт холбогдон, Эрүүгийн хуулийн 22.5 дугаар зүйлд заасан үндэслэлээр яллагдаж, шүүхийн шатанд шилжсэн байна.
Түүнчлэн иргэн Б.У нь Истанбул–Улаанбаатар чиглэлийн нислэгээр зорчих үедээ тээшиндээ мансууруулах болон сэтгэцэд нөлөөт бодис нуун авчирч, улсын хилээр хууль бусаар нэвтрүүлсэн хэргээр Эрүүгийн хуулийн 20.7 дугаар зүйлийн 3.3-т заасан /мансууруулах болон сэтгэцэд нөлөөт бодисыг хууль бусаар ашиглах/ үндэслэлээр Төв аймгийн сум дундын анхан шатны шүүхэд шилжүүлжээ.
