2026 онд АНУ, Мексик, Канадад болох хөлбөмбөгийн дэлхийн аварга шалгаруулах тэмцээний (ДАШТ) урьдчилсан шатны тоглолтууд үргэлжилж байна. Өнөөдрийн байдлаар зохион байгуулагч гурван орноос гадна 22 баг шигшээ тэмцээнд оролцох эрхээ авсан бөгөөд тэдний тоонд Африкийн жижиг арлын улс Кабо Верде багтлаа.
Түүхэн амжилт — Кабо Верде ДАШТ-д анх удаа
Африкийн бүсийн “D” хэсэгт багтсан Кабо Верде улсын шигшээ баг Эсватинигийн (хуучнаар Свазиланд) багийг 3:0-ийн харьцаатай буулган авч, нийт 23 оноо цуглуулснаар хэсгээ тэргүүлж түүхэндээ анх удаа дэлхийн аваргад оролцох эрхээ авсан байна.
Энэ ялалт нь Африкийн хөлбөмбөгийн хамгийн нэр хүндтэй багуудын нэг болох Камеруны “Номхрошгүй арслангууд”-ыг өнгөрсөн есдүгээр сард 1:0-ээр хожсоноос хойш “Цэнхэр аварга загас” хэмээн нэрлэгддэг Кабо Вердегийн багт гараа олгосон чухал боломж болжээ.
Хагас зуун жилийн өмнө колони байснаас дэлхийн тавцанд
Кабо Верде нь ердөө 50 жилийн өмнө, 1975 онд Португалийн колоничлолоос тусгаар тогтносон улс юм. Улсын хөлбөмбөгийн холбоо 1982 онд байгуулагдаж, 1986 онд ФИФА-д гишүүнээр элссэн байна.
Португалиар “Ногоон хошуу” гэсэн утгатай Cabo Verde нэрийг 2013 онд НҮБ-д хүсэлт гарган, орчуулгагүйгээр ашиглахаар болгосон нь тус улсын бие даасан байдлын илэрхийлэл болсон билээ.
Дэлхийн хамгийн жижиг орнуудын нэг хөлбөмбөгийн оргилд
Атлантын далайд орших 10 арлаас бүрдэх Кабо Верде нь Африкийн баруун эргээс 570 км-ийн зайд байрладаг бөгөөд 2022 оны байдлаар 590 мянга орчим хүн амтай.
Хүн амын тоогоор Кабо Верде нь 2018 оны ДАШТ-д оролцсон Исланд (330,000 хүн)-ын дараа дэлхийн аваргад оролцсон хоёр дахь хамгийн бага хүн амтай улс болох юм.
Кабо Верде улсын түүхэнд энэ амжилт нь зөвхөн спортын төдийгүй үндэсний бахархлын шинэ үеийг нээсэн үйл явдал болж байна.
