Леброн Жеймс шүтэн бишрэгчдээ төөрөгдүүлж, “зодог тайлна” гэсэн хүлээлтийг ашиглан реклам хийжээ

NBA-ийн домог Леброн Жеймс дахин анхаарлын төвд

NBA-ийн бүх цаг үеийн хамгийн өндөр оноотой тоглогч Леброн Жеймс энэ улиралд 23 дахь жилдээ тоглох гэж байна. Өдгөө лигийн хамгийн ахмад тоглогч болсон тэрбээр “хэзээ зодог тайлах вэ?” гэх асуултыг сагсан бөмбөгийн ертөнц даяар дахин хөндүүллээ.

“Хоёрдугаар шийдвэр” нэртэй бичлэгээс үүдсэн хүлээлт

Аравдугаар сарын 6-нд Леброн “X” (хуучнаар Twitter) платформ дээр нэгэн богино бичлэг нийтэлж, “The decision of all decisions. October 7th. 12pm EST. #TheSecondDecision” хэмээн тайлбар бичжээ.
Энэхүү мэдэгдэл олон нийтийн дунд түүнийг улирлын дараа зодог тайлах гэж байна гэсэн хүлээлтийг үүсгэсэн юм.

Өмнөх түүхэн “шийдвэр”

2010 онд Леброн “The Decision” нэртэй телевизийн шууд нэвтрүүлгээр “Кливленд Кавальерс”-аас “Майами Хит”-д шилжиж буйгаа зарласан нь NBA-ийн түүхэнд шинэ эрин эхлүүлсэн үйл явдал байлаа.
Харин энэ удаа тэр ижил нэртэй үг хэллэгийг ашигласнаар шүтэн бишрэгчдийн анхаарлыг улам татсан юм.

Коби Брайантийн зодог тайлалттай давхцал

Сонирхолтой нь, “Лос Анжелес Лэйкерс”-ийн энэ улирлын хамгийн сүүлийн тоглолт Коби Брайантийн зодог тайлах үед тоглосон баг болох “Юта Жазз”-ийн эсрэг тохиож байна. Энэ давхцал шүтэн бишрэгчдийн хардлагыг улам гүнзгийрүүлж, тэд тасалбарын үнийг богино хугацаанд 510 ам.долларт хүргэх хүртэл өсгөжээ.

Гэнэтийн эргэлт — зодог тайлах бус, вискиний сурталчилгаа

Хүлээлт оргилдоо хүрэх мөчид Леброн Жеймсийн “том мэдэгдэл” нь “Hennessy” брэндийн шинэ вискиний сурталчилгаа болох нь ил болж, олон сая шүтэн бишрэгчдийн итгэлийг алдсан юм.
Ингэснээр тэрээр спортын ертөнцийн хамгийн “амжилттай, гэхдээ маргаантай” сурталчилгаануудын нэгийг хийжээ.

Шүүмжлэл ба хандлага

NBA-ийн шинжээч Б.Ялалт энэ талаар цахим хуудсандаа дараах байр суурийг илэрхийлсэн байна.

“Леброний үүсгэсэн хүлээлт сурталчилгаа байв. Мэдээж сүпер сурталчилгаа болсон. Гэхдээ тэр замналаа идэж эхлэх хэмжээний тамирчин биш юм сан. Энэ сурталчилгааныхаа төлөө хангалттай ихийг авсан байх.
Гэхдээ Леброны зодог тайлах мэдээг дараа нь яаж хүлээж авах вэ? Дахиад сурталчилгаа гэж бодох уу? Лав л нэвтрүүлэг хийхгүй юм шиг байна. Хийсэн ч энэ удаагийнх шиг хандалт авахгүй байх. Нэг үгээр тэр өөрийнхөө зодог тайлах легасиг энэ удаад худалдлаа.”

Тэр мөн:

“Майкл Жордан, Коби Брайант зодог тайлах тухай шийдвэрээ реклам болгож байсан гэж үү? Стеф зодог тайлах шийдвэрээ ‘Under Armour’-т зарах болов уу? Зарж болдоггүй зүйл гэж байдаг шүү дээ,” хэмээн онцолсон байна.

Дүгнэлт

Леброн Жеймсийн энэхүү маркетингийн алхам шүтэн бишрэгчдийн итгэлийг эвдсэн ч спортын бизнес, маркетингийн хувьд гайхалтай хөндлөн стратеги байлаа. Гэхдээ нэг зүйл тодорхой — тэр энэ улиралд зодог тайлахгүй.
Харин түүний алдар цуутай замнал хэзээ өндөрлөх вэ гэдэг асуулт NBA-ийн хамгийн халуун сэдэв хэвээр байна.