БНСУ-ын к-поп салбарт Монголын залуус уран бүтээлийн гараагаа эхлүүлж буй жишээ цөөнгүй бөгөөд сүүлийн жилүүдэд олон улсын гишүүдтэй шинэ хамтлагууд нэмэгдэхийн хэрээр ийм боломжууд илүү анзаарагдах болсон. Энэ удаа Б.Энэрэл (Enny), н.Эгшиглэн (Melody) нар Солонгосын к-поп ертөнцөд албан ёсоор дэбютээ хийхээр болсон тухай мэдээлэл гарлаа.
Тодруулбал, тэд Troy Entertainment-ийн гаргаж буй “Навиллэра” нэртэй шинэ хамтлагт багтаж, ойрын хугацаанд дэбют хийх нь тодорхой болсон байна. Мэдээллээр тус хамтлаг нийт дөрвөн гишүүнтэй байх бөгөөд монгол хоёр гишүүний зэрэгцээ үлдсэн хоёр нь Солонгос охид байхаар бүрэлдэхүүнээ бүрдүүлжээ. Ийнхүү “Навиллэра” нь олон улсын бүрэлдэхүүнтэй, дөрвөн гишүүнтэй шинэ төслийн хэлбэрээр к-поп зах зээлд гарч ирэхээр болж байна.
Гишүүдийн үүргийн хувьд Б.Энэрэл нь гол хоолой болон репперийн байр суурьтайгаар дэбют хийх бол н.Эгшиглэн нь гол хоолойн үүрэгтэйгээр хамтлагийн бүрэлдэхүүнд орж байгаа аж. Энэхүү мэдээлэл нь Монголын к-поп сонирхогчдын анхаарлыг татаж, хоёр уран бүтээлчийн шинэ хамтлаг дахь оролцоо, цаашдын уран бүтээлийн чиглэлд хүлээлт нэмэгдүүлж байна.
