2025 оны зургадугаар сарын 7-ны үүрээр морьт харваа болон намнаа хэмээх Монголын уламжлалт өв соёлыг түгээн дэлгэрүүлэх зорилгоор тусгайлан сургаж байсан 18 адууг хулгайлан, улмаар бүхийг нь төхөөрсөн ноцтой хэрэг гарсан байна. Хэргийг илрүүлэхээр Эрүүгийн цагдаагийн албаны малын хулгайн гэмт хэрэгтэй тэмцэх тасаг, Хан-Уул дүүргийн цагдаагийн хэлтэс болон Налайх дүүргийн цагдаагийн алба хаагчид хамтран гурав хоногийн турш эрэн сурвалжилсны үр дүнд өнгөрсөн шөнө буюу зургадугаар сарын 13-нд сэжигтнүүдийг дайчлан баривчилжээ.
Эх сурвалжуудын мэдээлж байгаагаар, энэ гэмт хэргийг 18-29 насны зургаан залуу бүлэглэн зохион байгуулалттайгаар үйлдсэн байж болзошгүй байгаа аж. Харамсалтай нь, тусгай сургалттай адуунууд бүгд төхөөрөгдсөн байдалтай олдсон бөгөөд морьдыг бойнд өгсөн нь мөрдөн байцаалтын явцад тогтоогджээ.
Уг адуунууд нь удахгүй болох олон улсын морьт харвааны уралдаанд оролцохоор Жаргалантын аманд зусаж, бэлтгэл сургуулилт хийж байсан бөгөөд тэднийг гурав, дөрвөн хүн нийлж бүлэглэн баруун хойш чиглэлд тууж авч явсан байна. Цаашлаад адуунуудын байршлыг хянаж байсан GPS төхөөрөмжийг салгаж, холдуулсан нь ч мөн олдоод байв.
Одоогоор мөрдөн шалгах ажиллагаа үргэлжилж байгаа бөгөөд хэргийг эрүүгийн хуулийн хүрээнд хулгайн болон эд хөрөнгийн эсрэг гэмт хэрэгт тооцон шалгаж байгаа аж. Албаны хүмүүс иргэдэд хандан адуу мал, соёлын үнэт зүйлсийг хамгаалах, хяналтын системийг сайжруулах, гэмт хэргээс урьдчилан сэргийлэх тал дээр илүү анхаарал хандуулахыг зөвлөж байна.
