Сүлд мод, хамгаалалтын дэглэмийг дүрэмтэй уялдуулж чангатгах шаардлагатай
Аж ахуйн нэгж, байгууллагууд сүлд модыг дүрмийн дагуу угсарч ашиглах, тухайн обьектын харуул хамгаалалтын сонор сэрэмжийг нэмэгдүүлж, болзошгүй эрсдэлээс урьдчилан сэргийлэхийг ОБЕГ-аас анхаарууллаа.
Шинэ жилийн баярын арга хэмжээний үеэр иргэд, аж ахуйн нэгж, байгууллагууд салют, бенгалын гал болон чанарын шаардлага хангаагүй пиротехникийн хэрэгслийг дур мэдэн хэрэглэх явдал давтагддаг бөгөөд энэ нь бэртэл, гэмтэл төдийгүй гал түймрийн эрсдэлийг өсгөдөг гэж сэрэмжлүүлэв.
Зөвшөөрөлгүй худалдаа, буруу хэрэглээнээс болж бэртэл гарч байсан
ОБЕГ-ын мэдээллээр, зөвшөөрөлгүй газраас пиротехникийн хэрэгсэл худалдан авч салют буудуулах, сүлд модыг чимэглэхдээ мэргэжлийн бус хүнээр хийлгэснээс үүдэн бэртэж гэмтэх тохиолдол өмнө нь бүртгэгдэж байжээ. Тухайлбал, 2010-2011 онд пиротехникийн хэрэгсэлтэй холбоотойгоор 11 хүн өртөж, бие эрхтэнээ гэмтээсэн байна.
Нийслэлд пиротехникийн хэрэгсэл худалдах, борлуулахыг хориглосон
Пиротехникийн хэрэгслийг худалдан, борлуулахыг Нийслэлийн ИТХ-ын тэргүүлэгчдийн 2011 оны 27 дугаар тогтоол, нийслэлийн Засаг даргын 662 дугаар захирамжаар хориглосон байдаг. Үүнтэй холбоотойгоор ОБЕГ-аас иргэд, байгууллагуудад дараах сэрэмжлүүлгийг хүргэж байна.
- Зөвшөөрөлгүйгээр салют, бенгалын гал зэрэг пиротехникийн хэрэгслийг иргэдийн гар дээрээс худалдаж авахгүй байх
- Эрх бүхий байгууллагаас худалдан авсан бол заавар, санамжийг мөрдөх
- Сүлд модоо 12 волтын хүчдэлтэй гэрлэн чимэглэлээр чимж, цахилгааны утасны холболтыг дүрмийн дагуу хийх
- Цагаан бенгалын галыг хялбар шатах материалын ойролцоо цацруулахгүй байх
- Цацарч дууссаны дараа цаас, саа, хөвөн зэрэг шатамхай зүйл дээр хаяхгүй байх
- Оргилуурт гэрэл, тэсрэх бодис, динамидийг орон байр, сүлд модны ойролцоо хэрэглэхгүй байх
