Өмнөговь аймаг говийн аялал жуулчлалыг сурталчлан таниулах зорилгоор “Элсэн манхны баяр” арга хэмжээг долоо дахь жилдээ уламжлал болгон зохион байгуулах гэж байна. Энэ жилийн баяр 2025 оны наймдугаар сарын 15-17-ны өдрүүдэд болох бөгөөд байгалийн үзэсгэлэнт тогтоц бүхий Хонгорын элс, Дуут манхан орчмын бүсэд зохиогдоно.
Даланзадгад хотоос зүүн хойш 270 км-ийн зайд орших тус газар нь Өмнөговийн есөн гайхамшгийн нэг, аялал жуулчлалын чухал төв гэдгээрээ онцлог.
Баярын гол зорилго:
- Говийн өвөрмөц тогтоц, байгалийн сайхныг олон нийтэд сурталчлах
- Дотоод, гадаад жуулчдын аяллын хугацааг уртасгах
- Аялал жуулчлалын салбарын хөгжилд хувь нэмэр оруулах
Арга хэмжээний онцлох хэсгүүд:
- Элсний авто уралдаан
- Элсний волейбол
- Оргил булаалдах тэмцээн
- Элсний үдшийн шоу тоглолт
- Эртний үлэг гүрвэлийн болон говийн домгуудаар элсэн урлал бүтээх үзүүлбэрүүд
Эдгээр тэмцээн, үзүүлбэрүүд нь оролцогчдод сонирхолтой бөгөөд аяллын шинэ өнгө төрхийг мэдрүүлдэг тул жуулчдын тоо жилээс жилд нэмэгдсээр байгаа. Жишээлбэл, 2024 онд нийт 36,000 жуулчин (гадаадын 17,000, дотоодын 19,000) “Элсэн манхны баяр”-т оролцож, говийн гайхамшгийг өөрийн биеэр мэдэрчээ.
