УБЦТС: Зарим байршилд 1–1.5 цагийн хязгаарлалт хийх боломжтой
2026 оны нэгдүгээр сарын 26-нд нийслэлийн хэмжээнд цахилгаан эрчим хүчний хязгаарлалт хийж болзошгүй байршлуудыг Улаанбаатар Цахилгаан Түгээх Сүлжээ (УБЦТС) ТӨХК олон нийтэд мэдээллээ.
“Диспетчерийн үндэсний төв” ТӨХХК-ийн шийдвэрийн дагуу эрчим хүчний системд аваарын горим үүсэхээс урьдчилан сэргийлэх зорилгоор тодорхой бүсүүдэд төлөвлөсөн хэрэглээг хуваарийн дагуу нэг цагаас нэг цаг 30 минутын хугацаатайгаар хязгаарлах арга хэмжээ авч байна гэж компанийн зүгээс тайлбарлав.
Гэвч нийслэлийн эрчим хүчний хэрэглээний ачаалал огцом нэмэгдэж буйтай холбоотойгоор зарласан зарим цагийн хуваарьт өөрчлөлт орж болзошгүйг онцолж, иргэд, аж ахуйн нэгжүүдийг мэдээллээ тогтмол шалгаж байхыг сануулжээ.
Иргэд, аж ахуйн нэгжүүдэд хэрэглээгээ багасгахыг уриалав
Эрчим хүчний системийн тасралтгүй, найдвартай ажиллагааг хангахын тулд оргил ачааллын цагуудад зайлшгүй шаардлагатай бус цахилгаан хэрэгслүүдээ унтраах, цахилгаан тогоо болон өндөр чадлын төхөөрөмжийн тохиргоог бууруулахыг УБЦТС иргэд, аж ахуйн нэгжүүдэд уриалж байна.
Ингэснээр системийн ачааллыг бууруулж, аваарын хэмжээнд хүрэх эрсдэлийг багасгах, цахилгаан хангамжийг өргөн хүрээнд тасалдахаас сэргийлэх боломжтой гэж мэргэжлийн байгууллагууд тайлбарлаж байна.
Цахилгаан хязгаарлалт хийх эсэх, яг ямар хуваарийн дагуу хэрэгжүүлэх нь тухайн өдрийн бодит хэрэглээ, системийн ачааллаас шууд хамаарах тул албан ёсны эх сурвалжаас мэдээллээ нягталж байх нь зүйтэй байна.
