“Playtime 2025” хөгжмийн фестивалын үеэр зохион байгуулагчид болон цагдаагийн байгууллагын хамтран ажилласан шалгалтаар нийт 10 сүх, 33 хайч, 7 зодооны зориулалттай эд зүйл илрүүлэн хураажээ. Энэхүү шалгалтыг металл илрүүлэгч төхөөрөмжийн тусламжтайгаар зохион байгуулсан байна.
Цагдаагийн Ерөнхий Газраас мэдээлснээр ийм төрлийн хяналт шалгалтыг баяр наадмын өдрүүдэд мөн үргэлжлүүлэн хийхээр төлөвлөсөн бөгөөд Төв цэнгэлдэх хүрээлэн болон Хүй долоон худагт иргэдийг металл илрүүлэгчээр нэвтрүүлж, аюултай эд зүйлсийг дотогш оруулахгүй байх бодлого баримталж байна.
Мөн иргэдийг бусдын биед гэмтэл учруулж болзошгүй хутга, хайч, сүх зэрэг мэс зэвсэг болон зодооны хэрэгсэл авч явахгүй байхыг анхаарууллаа. Хэрэв эдгээр зүйлсийг авч явсан нь илэрвэл Зөрчлийн тухай хуулийн 5.1.2 дахь заалтад нийцүүлэн хуулийн хариуцлага хүлээлгэнэ гэдгийг холбогдох албанаас онцоллоо.
