Засгийн газар томуугийн дэгдэлтийн үеэр хэрэгжүүлэх шинэ арга хэмжээг баталлаа
Засгийн газрын өнөөдрийн ээлжит хуралдаанаар томуу, томуу төст өвчний дэгдэлтийн үед хэрэгжүүлэх зарим арга хэмжээний тухай тогтоолыг хэлэлцэн баталлаа. Энэхүү шийдвэрийн хүрээнд 2025 оны арваннэгдүгээр сарын 1-нээс 2026 оны гуравдугаар сарын 1-нийг хүртэл томуу, томуу төст өвчнөөр өвчилсөн 6 хүртэлх насны хүүхдээ асарч байгаа эцэг, эх, асран хамгаалагчийн аль нэгэнд тав хоногийн цалинтай чөлөө олгох зохицуулалт хэрэгжих юм.
Хувийн хэвшилд мөн адил хандив өгөхийг уриалжээ
Тогтоолын дагуу төсвийн байгууллагуудын удирдлагууд уг зохицуулалтыг хэрэгжүүлэх үүрэгтэй бөгөөд хувийн хэвшил болон төрийн бус байгууллагын ажил олгогчдод мөн ижил нөхцөлөөр цалинтай чөлөө олгохыг Засгийн газар уриалсан байна. Энэхүү арга хэмжээ нь томуугийн дэгдэлтийн үед хүүхдийн асаргаа, халдвараас сэргийлэхэд чиглэж байгаа юм.
Томуугийн оргил үе 12 дугаар сараас 1 дүгээр сар хүртэл үргэлжилнэ
Эрүүл мэндийн яамны мэдээлснээр, Монгол Улсад томуу, томуу төст өвчин 9 дүгээр сарын сүүлчээс эрчимжиж, 12 дугаар сарын дунд үеэс 1 дүгээр сарын эхээр оргил үе тохиодог. Урьдчилсан тооцоогоор өвчний оргил үед долоо хоногт 13,000-42,000 хүн амбулаториор үйлчлүүлэх, 1,300-4,600 хүн амьсгалын замын цочмог хүнд халдвараар эмнэлэгт хэвтэх магадлалтай байна.
Хүүхдүүд хамгийн их эрсдэлтэй бүлэг хэвээр байна
Эрдэм шинжилгээний дүнгээр томуу, томуу төст өвчин нь 5 хүртэлх насны хүүхдүүдэд хамгийн хүндээр нөлөөлдөг болохыг харуулжээ. Уушгины хатгаа өвчнөөр эмнэлэгт хэвтсэн хүүхдийн 25 орчим хувь нь томуу болон амьсгалын замын вирусийн халдвараас шалтгаалдаг байна. Манай улсын судалгаагаар жил бүр 100,000 хүүхэд тутамд 530-4,500 хүүхэд томуугийн шалтгаант амьсгалын замын цочмог хүнд халдвараар эмчлүүлдэг гэжээ.
Цалинтай чөлөө — өвчний хүндрэлээс сэргийлэх үр дүнтэй шийдэл
Эмч нарын мэдээлснээр, томуугийн шинж тэмдэг илэрснээс хойш 3-5 хоногийн дотор уушгины хатгалгаагаар хүндрэх эрсдэл өндөр байдаг бол эдгэрэх дундаж хугацаа 11.7 хоног байна. Иймд эцэг эх, асран хамгаалагчид хүүхдээ гэрээр асрах боломж бүрдсэнээр эмнэлгийн орны ачааллыг бууруулах, өвчний хүндрэлээс урьдчилан сэргийлэх чухал ач холбогдолтой гэж үзэж байна.
