Ирэх 2026 оны Улсын төсвийн төсөлд Монголын Засгийн газрын өр, зээлийн хэмжээ өмнөх оноос эрс нэмэгдэхээр тусгагджээ. Энэ онд Засгийн газрын дотоод өр 610 тэрбум төгрөг байсан бол дараа жилийн төсөвт 1 их наяд 40 тэрбум болж хоёр дахин нэмэгдэнэ. Мөн дотоодын зээлийн хэмжээ 2025 онд 300 тэрбум байсан бол ирэх онд 562.2 тэрбум төгрөг болохоор төлөвлөсөн байна.
Засгийн газрын ашиглах гадаад зээл, тусламжийг 2026 онд нийт 1.9 их наяд төгрөгт хүргэнэ. Өнөөдрийн байдлаар гадаад зээл, тусламжийн санхүүжилтэд 53.7 хувийн ашиглалттай, харин 907 тэрбум төгрөгийн ашиглаагүй үлдэгдэл байгаа аж. Гадаадын хамгийн өндөр зээл БНХАУ-аас орж ирсэн ба 9 төслийн хүрээнд нийт 431 тэрбумыг эзэлж байна.
Засгийн газрын өөр бусад өрийг 2025 оны төсөвт 6.4 их наяд байсныг 2026 онд 10.3 их наяд хүртэл буюу 4 их наяд орчмоор өсгөсөн. Харин өрийн баталгааг энэ онд 3.8 их наяд байсныг дараа онд 7.7 их наяд буюу хоёр дахин нэмэгдүүлж тусгасан нь анхаарал татаж буй. Ирэх онд Засгийн газрын өр ДНБ-ий 43.8 хувьд дөхөх тооцоо гарсан байна.
Өөрөөр хэлбэл, Монгол Улс ирэх жил төсвийн бүх төрлийн өр зээлийн хэмжээг эрс өсгөж, өрийн баталгааны дүнг хоёр дахин нэмэх санхүүгийн бодлого барихаар төсөлд тусгажээ.
