Америкийн нэр хүндтэй “The Wall Street Journal” (WSJ) сонинд мэдээлснээр, АНУ-ын Ерөнхийлөгч Дональд Трамп Ираны эсрэг цэргийн цохилт өгөх төлөвлөгөөг баталсан ч одоогоор хэрэгжүүлэх тушаал гаргаагүй байна.
Эх сурвалжуудын мэдээлснээр, Вашингтон Тегеранаас цөмийн хөтөлбөрөө яаралтай зогсоохыг шаардаж байгаа аж. Хэрэв АНУ цэргийн ажиллагаа явуулахаар шийдвэл Ираны уулын дор байрлах Фордо дахь уран баяжуулах үйлдвэрийг хамгийн түрүүнд бай болгож, анхаарлаа хандуулах гэнэ.
Уг байгууламж нь газар доорх бэхлэлттэй тул жирийн зэвсгээр устгах бараг боломжгүй гэж цэргийн шинжээчид дүгнэжээ. Зөвхөн өндөр нэвтрэлт бүхий цохилтын зэвсэг л ийм төрлийн объектод үр дүнтэй байж магадгүй хэмээн тэд онцолж байна.
“Axios” сайтад нийтлэгдсэн өөр нэг мэдээлэлд, Ерөнхийлөгч Трамп АНУ-ын зэвсэгт хүчнээс энэхүү нууц байгууламжийг нэвтрэн устгах боломжтой гэдгээ өмнө нь баталгаажуулахыг шаардсан байна. Түүнчлэн тэрээр шийдвэрээ хойшлуулж буй ч, мөргөлдөөнийг хэт удаан үргэлжлэх дайн руу оруулахгүй байхаар эрэмбэлж буй талаар мэдээлжээ.
Хэдийгээр Трампын засаг захиргаа хатуу байр суурьтай байгааг илэрхийлж байгаа ч, Ираныг цэргийн бус аргаар шахалт үзүүлэх оролдлого үргэлжилж байгаа бололтой.
