АНУ-ын Ерөнхийлөгч асан Дональд Трампын засаг захиргаанаас дэлхийн улс орнуудад ногдуулсан импортын тариф нь хууль бус гэх анхан шатны шүүхийн шийдвэр гарснаас нэг хоногийн дараа, пүрэв гарагт холбооны давж заалдах шатны шүүх түүнийг түр хугацаанд хүчинтэй хэвээр үлдээх шийдвэр гаргалаа. Энэхүү шийдвэр нь Трампын худалдааны бодлого одоогоор хүчин төгөлдөр хэвээр үлдэж байгааг баталгаажуулсан ч хожмын шатны эцсийн шийдвэрт нөлөөлөхгүй юм.
Давж заалдах шатны шүүхийн шийдвэр нь анхан шатны шүүхийн гаргасан дүгнэлтийг түр түдгэлзүүлж, улмаар Трампын “Чөлөөлөх өдөр” хэмээх импортын тарифын бодлого одоохондоо үргэлжлэх нөхцөлийг бүрдүүлж байна. Тухайн тарифын бодлогыг таван жижиг бизнесийн нэрийн өмнөөс Liberty Justice Center шүүхэд хандаж оруулсан бөгөөд энэ нь Трампын тарифын эсрэг хуулийн анхны томоохон сорилт болоод байгаа юм.
Трампын талын өмгөөлөгчид анхан шатны шүүхийн шийдвэрийг шүүмжлэн, уг шийдвэр нь ерөнхийлөгчийн гадаад худалдааны бодлогыг үндэслэлгүй хязгаарласан гэж үзэж байна. Тэдний тайлбарласнаар “гадаад бодлого болон эдийн засгийн стратегийг шүүхүүд биш, улс төрийн албадууд тодорхойлох ёстой” хэмээн мэдэгдэж, хэрвээ давж заалдах шатны шүүх дэмжээгүй бол Дээд шүүхэд хандах байсан гэдгээ ч нуусангүй.
Цагаан ордны хэвлэлийн төлөөлөгч Кэролин Ливитт тус асуудлаар мэдэгдэл хийж, “Ерөнхийлөгч Трамп эсвэл өөр төрийн тэргүүний дипломат ба худалдааны яриа хэлэлцээнд шүүх оролцвол төрийн үйл ажиллагаа доголдох аюултай” хэмээн онцлон хэлжээ.
Трампын худалдааны зөвлөх Питер Наварро мөн байр сууриа илэрхийлж, Цагаан ордон шүүхийн дарамтад автахгүй, тарифын бодлогынхоо ард бат зогсохоо мэдэгдсэн байна.
Түүнчлэн Goldman Sachs болон бусад санхүүгийн байгууллагын шинжээчдийн үзэж байгаагаар, хэрэв Трампын тал эцэслэн ялагдвал түүний баг тарифыг хамгаалах өөр аргыг эрэлхийлэх магадлалтай.
Дашрамд дурдахад, энэ нь эцсийн шүүхийн шийдвэр биш бөгөөд хэрэгтэй холбоотой дараагийн шүүх хурал зургадугаар сарын 5-нд товлогдоод байна.
