Нүүрсний хулгай болон авлигын асуудалд нэр холбогдсон хэмээн үзэж байна
Монгол Улсын Их Хурлын (УИХ) 67 гишүүн УИХ-ын дарга Д.Амарбаясгаланг огцруулах тухай албан бичигт гарын үсэг зуржээ. Энэ талаар өнөөдөр нэр бүхий гишүүд мэдээлэл хийв.
З.Мэндсайхан: “Тэр төрийн дээд байгууллагыг удирдах ёс суртахууны эрхгүй”
УИХ-ын гишүүн З.Мэндсайхан мэдээллийн үеэр:
“Монгол Улсын Их Хурлын дарга Д.Амарбаясгаланг огцруулах тухай санал гаргаж байна. Тэрбээр нүүрсний хулгай, авлига, албан тушаалын гэмт хэргийн шинжтэй асуудалд нэр холбогдсон ч өөрийн бүрэн эрхээсээ түдгэлзэж шалгуулахаас татгалзсан. Энэ нь УИХ-ын нэр хүнд, төрийн дээд байгууллагын ёс суртахуунд ноцтой сэв суулгаж байна. Тиймээс бид Д.Амарбаясгаланг төрийн эрх барих байгууллагыг удирдах улс төрийн болон ёс суртахууны эрхгүй гэж үзэж байна” хэмээлээ.
Хуулийн заалт ба гарын үсэг зурсан гишүүдийн тоо
“Монгол Улсын Их Хурлын тухай” хуулийн 12 дугаар зүйлийн 2.3-т “УИХ-ын нийт гишүүний олонх нь УИХ-ын даргыг огцруулах үндэслэл бүхий санал гаргасан бол уг асуудлыг УИХ хүлээн зөвшөөрсөнд тооцно” гэж заасан байдаг. Мөн ижил зүйлийн 3 дахь хэсэгт “Хуралдаанд оролцсон гишүүдийн олонх дэмжсэн тохиолдолд уг тогтоол хүчин төгөлдөр болно” гэж хуульчилжээ.
Огцруулах санал бүхий албан бичигт:
- МАН-ын 34 гишүүн
- АН-ын 31 гишүүн
- Бусад нам, эвслээс 2 гишүүн
гарын үсэг зурсан байна.
Ингэснээр нийт 67 гишүүн Д.Амарбаясгаланг огцруулах саналд нэгдээд байна.
Албан бичгийг УИХ-ын дэд даргад гардуулна
З.Мэндсайхан гишүүний мэдээлснээр уг албан бичгийг өнөөдөр УИХ-ын дэд дарга Х.Булгантуяад албан ёсоор гардуулах ажээ. Үүний дараа уг асуудлыг парламентын хуралдаанд оруулж, хэлэлцэх эсэхийг шийдэх юм.
