АНУ-д хийсэн шинэ судалгаагаар улаан махыг их хэмжээгээр хэрэглэх нь хэвлийн гол судасны хана томрох буюу аневризм үүсэх эрсдэлийг нэмэгдүүлдэг болохыг тогтоожээ. Хэвлийн гол судас нь зүрхнээс цусыг бүх биеэр түгээдэг хамгийн том артери бөгөөд түүний хананд өөрчлөлт гарах нь амь насанд аюултай өвчлөлийн нэг юм.
Судалгааны үр дүнг Jama Cardiology шинжлэх ухааны сэтгүүлд нийтэлсэн бөгөөд улаан мах, амьтны гаралтай бүтээгдэхүүн боловсруулах явцад үүсдэг триметиламин N-оксид (TMAO) гэх бодисын өндөр түвшин нь энэ эрсдэлтэй шууд холбоотойг тогтоожээ.
Кливленд клиникийн судасны мэргэжилтэн Скотт Камерон:
“Эдгээр олдворууд нь цусан дахь TMAO-ийн өндөр түвшинг эмчлэх нь хэвлийн аортын аневризмыг мэс заслын оролцоогүйгээр эмчлэх боломжийг харуулж байна” хэмээн онцолжээ.
Судалгаанд Европын 237, Америк тивийн 658 хүн хамрагдсан бөгөөд эрүүл хүмүүсийн мэдээллийг хэвлийн гол судасны аневризмтай өвчтөнүүдийнхтэй харьцуулсан байна. Үр дүнгээр TMAO-ийн түвшин өндөр байсан хүмүүсийн хувьд аневризм үүсэх магадлал гурван дахин өндөр байжээ.
Судалгааны багийн ахлагч, Кливленд клиникийн профессор Стэнли Хазен дараах дүгнэлтийг хийсэн байна:
“Гэдэсний нянгийн үүсгэсэн триметиламин нитроксидын хэмжээ улаан мах болон амьтны гаралтай бүтээгдэхүүний хэрэглээгээр нэмэгддэг. Энэ нь зөв хооллолт титэм судасны өвчнөөс урьдчилан сэргийлэхэд чухал гэдгийг баталж байна” гэжээ.
Эмч нарын зөвлөмжөөр, хэвлийн гол судасны судасжилттай болон зүрх судасны эрсдэл өндөртэй хүмүүс улаан махны хэрэглээг багасгах шаардлагатай. Тамхи татах, нас ахих болон бусад эрүүл мэндийн шалтгаан ч мөн энэ өвчний эрсдэлийг нэмэгдүүлдэг.
