Азийн хамгийн нэр хүндтэй холимог тулааны холбоодын нэг болох ONE Championship-ийн “One Fight Night 38” тэмцээн Монголын спортын түүхэнд шинэ хуудсыг нээсэн шөнө болж өндөрлөлөө. Уурхайн гүнээс амьдралаа эхлүүлсэн монгол залуу Б.Энх-Оргил дэлхийн тавцанд аваргын бүс зүүж, ONE холбооны шинэ аваргаар тодров.
Фабрико Андрадегийн ноёрхлыг зогсоосон мөч
Bantamweight буюу 65.8 кг-ын жинд 2023 оноос хойш аваргын бүсийг эзэмшиж, жингийнхээ “хаан” гэгдэж байсан Бразилын Фабрико Андраде энэ удаад чансааны №4-т бичигдэж байсан Монголын тулаанч Б.Энх-Оргилтой аваргын төлөө хүч үзсэн. Тэдний тулаан “One Fight Night 38”-ийн оргил мөргөлдөөнөөр зарлагдаж, үзэгчдийн хамгийн их хүлээлтийг дагуулсан билээ.
Харин дөрөвдүгээр үед Б.Энх-Оргил өрсөлдөгчөө нь боох мэхээр цэвэр ялснаар Андрадегийн ноёрхлыг зогсоож, ONE-ийн Bantamweight жингийн шинэ аварга болж, тус холбооны түүхэнд титэм зүүсэн хоёр дахь монгол тулаанч боллоо.
“Team Tungaa” ба уурхайгаас эхэлсэн урт замнал
Б.Энх-Оргил өнөөдөр “Team Tungaa” багийн нэг хэсэг болж, Монгол Улсын гавьяат тамирчин Ж.Нарантунгалагийн удирдлага дор бэлтгэлээ хийдэг. Тэрбээр 2009 оноос холимог тулааны спортоор тууштай хичээллэж, уурхайд ажиллаж явсан залуугаас олон улсын тайзан дээрх аварга хүртэлх замналынхаа ард цэвэр хөдөлмөр, шантралгүй бэлтгэлийг үлдээжээ.
Нарантунгалагийн гар доор бэлтгэл хийж, техникийн хувьд ч, сэтгэлзүйн хувьд ч төлөвшсөн Б.Энх-Оргилын энэ ялалт нь “Team Tungaa” багийн системтэй хөдөлмөр, монгол тулаанчдын түвшин дэлхийн дээд лигт хүрснийг дахин нотолсон үйл явдал боллоо.
ONE холбоонд найман тулаан, долоон ялалт
Б.Энх-Оргилын ONE холбоонд үзүүлсэн амжилтыг харвал аваргын бүс рүү алхам алхмаар хэрхэн дөхсөнийг тод харж болно. Тэрээр 2023 оноос хойш тус холбоонд найман тулаан хийснээс долооход нь ялалт байгуулсан бөгөөд сүүлийн гурван тулаандаа дараалан ялалт байгуулсан нь Андрадегийн эсрэг бүсийн төлөө тулалдах эрхийг авчрах гол шалтгаан болсон.
Аваргын бүс зүүхээс гадна түүний оролцсон энэхүү тулалдаан нь оройн “шилдэг тулаан”-аар шалгарч, 50,000 ам.долларын бонус шагнал хүртсэн байна. Ингэснээр Б.Энх-Оргил зүгээр нэг аварга болоод зогсохгүй үзэгчдийн хувьд ч хамгийн сэтгэл хөдөлгөсөн тулааны гол баатар болж чадлаа.
Ж.Нарантунгалагийн эхлүүлсэн түүхийг шавь нь үргэлжүүлэв
Түүний багш Ж.Нарантунгалаг 2014 онд Японы Кожи Оишиг ялж, ONE холбооны аваргын бүсийг Монголд анх удаа авчирч байсан билээ. Тэр цагаас хойш Нарантунгалаг аваргын бүсийн төлөө дахин хоёр ч удаа тулалдсан ч титмээ буцаан авч чадаагүй.
Харин 11 жилийн дараа, түүний шавь Б.Энх-Оргил аваргын бүсийг дахин Монгол руу авчран, нэг үеийн домгийг нөгөө үеийн амжилтаар холбож, Монголын ММА-гийн түүхийн хоёр аваргыг нэг баг, нэг сургуулилт, нэг удамшлын дор нэгтгэлээ.
Уурхайн гүнээс эхэлсэн нэгэн залуугийн түүх өнөөдөр дэлхийн тайзан дээр аваргын бүс зүүсэн бодит домог болон бичигдэж байна.
