Умард Солонгос Японы “цөмийн сонирхол”-д хатуу анхааруулга өгөв
Ням гарагт Умард Солонгосын гадаад хэргийн яамны эх сурвалж Япон улс цөмийн зэвсэгтэй болох хүсэл сонирхлыг “ямар ч үнээр хамаагүй урьдчилан сэргийлэх ёстой” хэмээн мэдэгдсэн байна.
Энэхүү байр суурь нь өнгөрсөн долоо хоногийн Пүрэв гарагт Японы засгийн газрын нэг албан тушаалтан “Бид цөмийн зэвсэгтэй болох ёстой гэж би бодож байна” гэж хэлснийг Киодо агентлаг уламжилсантай холбогдож гарч иржээ. Нэр нь ил болоогүй тус албан тушаалтан Японы аюулгүй байдлын бодлогыг боловсруулахад оролцсон хүн гэж мэдээлсэн байна.
Тэрбээр мөн “Эцсийн эцэст бид зөвхөн өөртөө найдахаас өөр замгүй” гэж хэлснийг Киодо эш татжээ.
Пёньяны төв хэвлэл: Токио “улаан шугам”-ыг давсан гэж шүүмжлэв
Өчигдөр Умард Солонгосын төв хэвлэлд нийтлэгдсэн мэдэгдэлд Токиогийн эрх баригчид “улаан шугамыг давж, цөмийн зэвсэгтэй болох хүсэл эрмэлзлээ ил тод илэрхийллээ” хэмээн буруутгасан байна.
Үүний дараа Умард Солонгосын гадаад хэргийн яамны Япон Судлалын Хүрээлэнгийн захирал “Японы цөмийн зэвсэгтэй болох оролдлого нь хүн төрөлхтөнд асар том гамшиг учруулах тул ямар ч үнээр хамаагүй урьдчилсан сэргийлэх ёстой” гэж хэлснийг Солонгосын Төв Мэдээний Агентлаг дамжуулжээ.
Мөн Умард Солонгосын өөр нэг албан тушаалтан “Энэ бол буруу мэдэгдэл, эсвэл болчимгүй мэдэгдэл биш. Харин Япон улсын цөмийн зэвсэгтэй болох гэсэн удаан хугацааны хүсэл эрмэлзлийг тодорхой харуулсан хэрэг” гэж мэдэгдсэн байна.
Токиогийн байр суурь: бодлого өөрчлөгдөөгүй, тайлбар өгөөгүй
Баасан гарагт Токиод болсон хэвлэлийн хурлын үеэр Японы засгийн газрын нарийн бичгийн дарга Минорү Кихара тус улсын цөмийн бодлого өөрчлөгдөөгүйг баталсан ч дээрх албан тушаалтны хэлсэн үгтэй холбоотойгоор тайлбар хийхээс татгалзжээ.
Түүнчлэн баасан гарагт АНУ-ын төрийн департамент Японыг дэлхийн цөмийн зэвсэг үл дэлгэрүүлэх хөдөлгөөний “тэргүүлэгч улс” гэж нэрлэсэн нь Токиод өгсөн анхааруулга байж болзошгүй гэж мэдээлэлд дурдсан байна.
Пёньян өөрийн цөмийн хөтөлбөрөө дурдсангүй
Өчигдрийн мэдэгдэлдээ Умард Солонгос өөрийн цөмийн хөтөлбөрийн талаар дурдаагүй байна. Гэвч тус улс НҮБ-ын тогтоолыг зөрчин уг хөтөлбөрийг хэрэгжүүлсээр ирсэн бөгөөд 2006 онд анхны цөмийн туршилтаа хийсэн гэж мэдээлэлд тэмдэглэжээ.
Есдүгээр сард НҮБ-ын ерөнхий ассамблейн чуулганд үг хэлэхдээ Умард Солонгосын гадаад хэргийн дэд сайд Ким Сон Гён тус улс цөмийн зэвсгээсээ хэзээ ч татгалзахгүй гэдгээ илэрхийлж байсан. Мөн удирдагч Ким Жон Ун цөмийн зэвсгийн статусаа хүлээн зөвшөөрсөн тохиолдолд Вашингтонтой яриа хэлэлцээ эхлүүлэхэд бэлэн гэдгээ мэдэгдэж байв.
