Япон улс 1999 оноос хойш анх удаа Өмнөд Солонгосоос цагаан будаа импортлов

Сүүлийн жилүүдэд Япон улсад хүнсний бүтээгдэхүүний үнэ, тэр дундаа цагаан будааны ханш огцом өссөн нь тус улсыг импортын шинэ эх үүсвэр эрэлхийлэхэд хүргэлээ. Үүний үр дүнд Япон улс энэ оны дөрөвдүгээр сард Өмнөд Солонгосоос 2 тонн цагаан будаа импортоор авч, 1999 оноос хойш анх удаа тус улсаас цагаан будаа оруулж ирсэн тохиолдол боллоо гэж хоёр улсын хэвлэлүүд мэдээлэв.

Импортын энэхүү гэрээг Өмнөд Солонгосын Хөдөө аж ахуйн үйлдвэрлэгчдийн холбооны Япон дахь салбар хэрэгжүүлсэн бөгөөд цагаан будааг Японы онлайн болон орон нутгийн дэлгүүрүүдээр худалдаалсан байна. Хэдийгээр импортын хэмжээ Японы нийт цагаан будааны хэрэглээтэй харьцуулахад өчүүхэн боловч энэ алхам нь Солонгосын үйлдвэрлэгчдэд гадаад зах зээлд гарч, цар тахал, худалдааны бодлогын өөрчлөлтөөс үүдэлтэй буурсан экспортоо нөхөх боломж олгож байна хэмээн шинжээчид дүгнэжээ.

Японд импортоор орж ирэх цагаан будаанд өндөр татвар ногдуулдаг бөгөөд 770 мянган тонн татваргүй импортын ангиллыг давсан тохиолдолд килограмм тутамд 340 иен буюу 2.40 ам.долларын татвар ногдуулдаг. Нэмж хэлэхэд, Японы хэрэглэгчид дотоодын тариаланчдынхаа бүтээгдэхүүнийг илүүд үздэг уламжлалтай тул гадаадын будаа импортлох нь логистик болон соёлын талаасаа ч хүндрэлтэй байдаг.

Гэвч энэ онд Японд цагаан будааны үнэ жилийн өмнөхтэй харьцуулахад 92 хувиар өсөж, 1971 оноос хойших хамгийн хурдацтай өсөлт бүртгэгдээд байна. Японы Дотоод хэргийн яамны мэдээлснээр, цагаан будааны ханшийн өсөлт нь инфляцын ерөнхий түвшинд ч сөрөг нөлөө үзүүлж байгаа аж.

Саяхан болсон Өмнөд Солонгос, Хятад, Японы худалдааны асуудал эрхэлсэн эрх баригчдын уулзалтаар чөлөөт худалдааг өргөжүүлэх, хамтын ажиллагааг нэмэгдүүлэх асуудлыг хэлэлцсэн нь Азийн орнууд хоорондын эдийн засгийн уялдаа холбоог бэхжүүлэх алхам болж байгааг энэ үйл явдал харуулж байна.

Солонгосын талаас мэдээлснээр, эхний 2 тонн цагаан будаа хэдийнэ худалдаалагдаж дууссан бөгөөд ирэх долоо хоногт нэмэлт 20 тонныг нийлүүлэхээр төлөвлөжээ.