2025 оны долдугаар сарын 30-31-ний өдрүүдэд Хэнтий аймгийн Батширээт сумыг зорих жуулчдын хөл тасрахгүй бололтой. Учир нь тус суманд уламжлалт “Ёохор хатар-2025” наадмыг 150 сая төгрөгийн төсвөөр зохион байгуулах гэж байна. Энэхүү арга хэмжээ нь буриад түмний соёл, өв уламжлалыг сурталчлах зорилготой бөгөөд олон төрлийн тэмцээн уралдаантай байх юм.
Наадмын гол онцлох хэсгүүд нь:
- Ёохор бүжгийн уралдаан
- Хатар жороо
- Морин уралдаан
- Буриад сур харваа
- Буриад бөхийн барилдаан
- Сээр шалгах уламжлалт тэмцээн
Тэмцээн бүрийн шилдэг оролцогчдыг өргөмжлөл болон мөнгөн шагналаар шагнах юм.
Наадмыг зөвхөн дотоодын оролцогчид бус, гадаадын олон улс, бүс нутгаас ирсэн зочид, оролцогчид ч сонирхон оролцох төлөвтэй. Тодруулбал, ОХУ-ын Буриад Улс, Өвөр Байгалийн хязгаар, Эрхүү муж, мөн Хятадын ӨМӨЗО-ны Хөлөнбуйр аймаг, Шинэхэн хошуу зэргээс төлөөлөгчид хүрэлцэн ирэхээр болжээ.
2023 онд болсон өмнөх наадамд гадаад, дотоодын нийт 2400 гаруй жуулчин оролцсон нь энэхүү соёлын наадмын ач холбогдлыг тодхон харуулсан юм.
Монгол Улсын Засгийн газар 2023-2028 оныг “Монголд зочлох жил” хэмээн зарласан бөгөөд энэ хүрээнд “Go Mongolia” хөтөлбөрийг хэрэгжүүлж байна. Уг наадам нь уг хөтөлбөрийн нэг хэсэг болж, бүс нутгийн аялал жуулчлал, үндэсний өв соёлыг түгээн дэлгэрүүлэхэд чиглэжээ.
“Ёохор хатар-2025” наадмыг дараах байгууллагууд хамтран зохион байгуулж байна:
- Хүүхэд, гэр бүлийн хөгжил хамгааллын ерөнхий газар
- Биеийн тамир, спортын улсын хороо
- Соёл, урлаг, аялал жуулчлал, залуучуудын газар
