NBA-ийн Чикаго Буллз баг Австралийн авьяаслаг тоглогч Жош Гиддигийн гэрээг шинэчилснээ албан ёсоор зарлалаа. Гэрээний нарийн нөхцөлийг баг ил тод мэдээлээгүй ч ESPN-ийн мэдээлснээр түүнийг дөрвөн жилийн хугацаатай, бүрэн баталгаатай 100 сая ам.долларын гэрээнд гарын үсэг зурсан гэжээ.
Гидди өнгөрсөн улиралд Буллзийн бүрэлдэхүүнд 70 тоглолтод оролцож, 14.6 оноо, 8.1 бөмбөг авалт, 7.2 дамжуулалт болон 1.2 бөмбөг таслалт гүйцэтгэсэн нь түүний карьерийн дээд үзүүлэлтүүдийн нэг байлаа.
Түүхэн амжилттай харьцуулбал
Буллзийн түүхэнд Жорданаас өөр тоглогч 14 оноо, 8 бөмбөг авалт, 7 дамжуулалтыг нэг улиралд дундажлаж байгаагүй. Жиддигийн энэ амжилт домогт Майкл Жорданыг санагдуулам ховор тохиолдол боллоо.
Мөн Австрали тоглогч 1988-89 оны улирлаас хойш Буллзийн хувьд хамгийн олон double-double (30) гүйцэтгэсэн бөгөөд нэг улиралд долоон удаа triple-double хийснээр Жорданы дараа хоёрдугаарт бичигдсэн байна.
Карьерийн замнал
22 настай Гидди NBA-д орж ирэхийн өмнө эх орондоо Аделаидын багт нэг улирал тоглосон. Түүнийг 2021 оны драфтын зургаадугаар сонголтоор Оклахома Сити Тандер баг авч, гурван улирал үндсэн бүрэлдэхүүнд тоглуулсны дараа 2024 оны зун Алекс Карусогийн солилцоогоор Чикаго руу ирүүлсэн юм.
Өнгөрсөн улиралд Гидди 105 гурван онооны шидэлт амжилттай гүйцэтгэж, Буллзийн түүхэнд нэг улиралд хамгийн олон (1,271) гурван онооны дүн гаргахад томоохон хувь нэмэр оруулжээ.
Ерөнхий статистик
NBA-д тоглосон эхний дөрвөн улирлын дүнгээр тэрбээр нийт 280 тоглолтод 14.1 оноо, 7.5 бөмбөг авалт, 6.1 дамжуулалт, 0.9 бөмбөг таслалт дундажлаад байна.
