Торгуулийн мэдээлэл нэгдсэн сангаас E-Mongolia руу холбогдож эхэллээ
Иргэд болон хуулийн этгээдүүд зөрчлийн торгуулиа 2026 оны нэгдүгээр сарын 10-наас эхлэн E-Mongolia төрийн үйлчилгээний нэгдсэн цахим системээр онлайнаар төлөх боломжтой боллоо.
Энэ оны нэгдүгээр сарын 1-нээс эхлэн улсын хэмжээнд бүртгэгдэж буй бүхий л зөрчлийн талаарх мэдээллийг нэг эх сурвалжид төвлөрүүлж, нэгдсэн сангаар ашиглах эрх зүйн болон техникийн нөхцөл бүрдсэнтэй холбоотойгоор торгуулийн мэдээллийг цахимаар үзэж, шууд төлбөр хийх боломжийг бий болгож байна.
E-Mongolia-д зөрчлийн мэдээлэл, торгууль төлөх үйлчилгээг нэгтгэв
И-Монгол академи, Замын хөдөлгөөний удирдлагын төв, Улсын ерөнхий прокурорын газар, Сангийн яам хоорондын хамтын ажиллагааны хүрээнд зөрчлийн торгуулийн мэдээллийг E-Mongolia системд нэгтгэн, иргэн болон байгууллагад цахимаар хүргэх, торгуулиа онлайн байдлаар төлөх шинэ үйлчилгээг нэвтрүүлжээ.
Ингэснээр хэрэглэгч:
– өөрт хамаарах зөрчлийн мэдээллээ E-Mongolia-д нэвтэрч нэг цонхоор харах
– торгуулийн дүн, огноо, төрөл зэрэг мэдээллийг нэгдсэн байдлаар авах
– торгуулиа банк, карт, цахим төлбөрийн хэрэгслээр систем дотроосоо төлөх
боломжтой болж байгаа бөгөөд торгуулийн мэдээлэл тус тусын байгууллагаас салангид байдлаар лавлах шаардлага багасч байна.
Замын хөдөлгөөний удирдлагын төвөөс иргэдэд торгуулийн мэдээллээ тогтмол шалгаж, хуульд заасан хугацаанд нь цахимаар төлж хэвшихийг зөвлөж, энэ нь зөвхөн торгуулийн алданги, хүндрэлээс сэргийлээд зогсохгүй төрийн байгууллагын ачааллыг бууруулж, үйлчилгээний шуурхай байдалд эерэг нөлөө үзүүлнэ гэж онцолжээ.
