“Улаанбаатар марафон 2025” олон улсын гүйлтийн нээлт тавдугаар сарын 24-ний 09:30 цагт Соёлын төв өргөөний урд талбайд болно. Энэ жилийн тэмцээнд дотоод, гадаадын нийт 30,000 орчим хүн бүртгүүлээд байна.
Гүйлтийн төрлүүд ба оролцогчдын тоо:
- 5 км эрүүл мэндийн гүйлт – 18,000 оролцогч
- Гэр бүлийн гүйлт – 4,000 гаруй оролцогч
- 10 км, 21 км, 42 км – шинэчилсэн маршруттай
Тэмцээний нэгдсэн бие халаалт хийсний дараа бүх гүйгчид 10:00 цагт Соёлын төв өргөөний урдаас зэрэг гараанаас гарна. Энэ жил 5 км-ийн гүйлт нар буруу чиглэлтэй, хагас болон бүтэн марафоны гүйлт шинэ маршрутаар явагдана.
Үдээс хойш болох тусгай төрлүүд:
- 13:00 – Харааны болон тэргэнцэртэй иргэд (МУИС-ийн урдаас)
- 14:00 – Гэр бүлийн төрөл
- 14:30 – Тусгай олимпын 500 м (Спортын ордны урд)
- 15:00 – Тусгай олимпын 800 м (Улаанбаатар зочид буудлын урд)
Онцлох үйл явдлууд:
- 10 жилийн ойн үзэсгэлэн: Өмнөх онуудын онцлох зургуудаар бүрдсэн гэрэл зургийн үзэсгэлэнг талбайн том асрын ард дэлгэнэ.
- RFID технологи: “Hipay” компани дөрөв дэх жилдээ RFID систем ашиглан гүйгчдийн гараа, бариаг бүртгэж, барианд орсон зургийг бүртгэлтэй хаяг руу илгээх системийг хэрэгжүүлж байна.
- Сайн дурынхан: 450 сайн дурын ажилтан марафоны зохион байгуулалтад оролцож байна.
Зохион байгуулагчид оролцогчдыг бэлтгэлээ хангаж, нээлтээс өмнө цагаасаа эрт ирэхийг уриалж байна.
