Дундад Дорнодын зах зээлд Asus компани дэлхийн хамгийн үнэтэй график картуудын нэг болох ROG Astral RTX 5090 Dhahab Edition загварыг албан ёсоор худалдаанд гаргалаа. Алтлаг өнгөөр гялалзсан энэхүү ховор бүтээл нь 10 мянган ам.долларын үнэтэй бөгөөд онцлог нь зөвхөн өнгөний тоглолтоор хязгаарлагдахгүй — жинхэнэ цэвэр алтаар хийгдсэн бүрхүүлтэй аж.
Asus-ийн мэдээлснээр энэхүү тусгай загварт 999 сорьцын 6.5 грамм алт ашигласан байна. Энэ нь өнөөгийн зах зээлийн ханшаар ойролцоогоор 700 ам.доллар болох ч, картын нийт үнэ нь 6,700–10,600 ам.долларын хооронд хэлбэлзэж байгаа нь анхаарал татаж буй юм.
Гэсэн хэдий ч ROG Astral RTX 5090 Dhahab Edition нь техникийн үзүүлэлт, хүчин чадлын хувьд жирийн RTX 5090-оос ялгарах зүйлгүй. Зөвхөн гоёлын зориулалттай гадна төрх нь ялгагдаж байгаа энэ загварын нэр “Dhahab” нь араб хэлээр “алт” гэсэн утгатай бөгөөд Asus тансаг хэрэглээ, ховор цуглуулгын зах зээлийг онилжээ.
6.5 грамм алттай хэдий ч картын нийт үнийг бодит өртөгтэй нь харьцуулбал 3–4 дахин өндөр үнээр зарагдаж байгааг салбарынхан онцолж байна. Энэ нь уг бүтээгдэхүүнийг зөвхөн өндөр хүчин чадалтай техник төдийгүй брэнд, нэр хүндийн бэлгэдэл болгож буй хэрэг юм.
