Японы технологийн гигант “Sony” пүрэв гарагаас эхлэн АНУ дахь “PlayStation 5” консолын үнийг 50 ам.доллараар нэмэгдүүлэх шийдвэрээ зарлалаа. Энэ алхам нь тоглоомын зах зээлийн өсөлт саарч буй болон АНУ-аас татвар нэмэх магадлалтай болж, материалын өртөг өсөх эрсдэлийг харгалзсан шийдвэр гэж тайлбарлагдаж байна.
Шинэ үнэ
- “PS5”-ын бүх загвар ижил хэмжээгээр өснө.
- Ингэснээр хамгийн өндөр үнэтэй “PS5 Pro” загварын үнэ 749.99 ам.долларт хүрэхээр болжээ.
- Энэ тухай мэдээллийг “Sony” компани лхагва гарагт өөрийн блогтоо нийтэлсэн байна.
Үндэслэл
АНУ-ын Ерөнхийлөгч Дональд Трамп Хятад, Япон зэрэг томоохон үйлдвэрлэлийн бүсээс нийлүүлэх бараанд өндөр гаалийн татвар ногдуулах бодлогоо мэдэгдсэний дараа нийлүүлэлтийн тогтолцоо тасалдах, материалын үнэ нэмэгдэх эрсдэл үүссэн нь үнийн өсөлтөд хүргэсэн гол хүчин зүйл гэж үзэж байна.
Өмнөх алхмууд
- Энэ оны дөрөвдүгээр сард “Sony” Европ дахь консолын үнээ нэмсэн.
- Үүний дараагаар өрсөлдөгч “Xbox” компани АНУ, Европ, Австрали, Их Британид консол болон дагалдах хэрэгслийнхээ үнийг өсгөжээ.
Салбарын төлөв
Шинжээчдийн таамагласнаар:
- АНУ-ын “Take-Two Interactive”-ийн “Grand Theft Auto VI”,
- Японы “Nintendo”-гийн шинэ “Switch 2” консол
нь энэ жил тоглоомын зах зээлийг тэлэх гол хүчин зүйл болох ёстой байв. Гэвч консолын үнэ нэмэгдсэн, мөн тоглогчдын тэсэн ядан хүлээж буй “GTA VI” тоглоомын нээлт ирэх жил хүртэл хойшилсноор зах зээлийн өсөлтөд тодорхой эргэлзээ үүсгэж байна.
Бусад бүс нутагт
“Sony”-гийн мэдэгдсэнээр:
- Одоогоор АНУ-аас өөр бүс нутагт үнийн өөрчлөлт хийхгүй.
- “PlayStation 5”-ын дагалдах хэрэгслийн үнэ хэвээр хадгалагдана.
